Vroegwinter raak ál droër
DATA van die afgelope dekade dui aan dat daar in April en Mei ál minder reën in die winterreëngebiede val, terwyl veral Junie heelwat meer kry.
Mnr. Johan van den Berg, ’n onafhanklike landbouweerkundige, sê Malmesbury in die Swartland het sedert 2010 meer as 22% van sy reën in Junie gekry, en heelwat minder as voorheen in April en Mei. Dieselfde geld Bredasdorp in die SuidKaap, wat meer reën later in die winter gekry het. “Langtermynneigings toon dus ’n effense verhoging in reënval van Junie tot Augustus.”
Volgens die langtermyngemiddelde vir Malmesbury kom sowat 7% van dié distrik se jaarlikse reënval in April voor, 12% in Mei, 18% in Junie, 16% in Julie, 15% in Augustus en 10% in September. In die Bredasdorp-omgewing val 10% in April, 9% in Mei, 12% elk in Junie en Julie, 11% in Augustus en 9% in September.
Van den Berg sê met dit in gedagte kan die El Niño Suidelike Ossilasie-verskynsel en die matige La Niña-stelsel wat steeds voorkom, ook ’n impak op die winterreënval hê. Die La Niña-verskynsel oorheers weerstelsels sedert Julie 2021.
LA NIÑA SE EFFEK
“In soortgelyke seisoene in die verlede, waar ’n La Nina-stelsel weerstelsels oorheers het, het daar taamlike swaar reën gedurende die winter ook oor dele van die winterreëngebied en selfs oor die suid- en ooskus voorgekom.”
Die La Niña-stelsel het die afgelope somerseisoen tot swaar neerslae en in sommige gevalle rekordhoeveelhede reën gelei.
In 2011, toe daar ’n La Niña soortgelyk aan vanjaar geheers het, het daar op 7 tot 9 Junie 2011 baie swaar reën en vloede oor die Overberg, Wynland-distrik, Eden-distrik en die Sentraal-Karoo voorgekom, wat groot skade veroorsaak het.
“Soortgelyke voorvalle het ook voorgekom tydens die La Niña-verskynsels van die 1988-’89-seisoene, asook in 1974, 1975 en 1976, toe swaar reën en baie sterk windstorms groot skade veroorsaak het.”
AUSTRALIË
Die Australiese buro vir meteorologie het onlangs luidens ’n verklaring gesê klimaatmodelle dui aan ’n sterk negatiewe Indiese Oseaandipool (IOD) is tydens die winter moontlik. ’n Sterk negatiewe IOD kan bydra tot hoër reënval oor dele van Australië en Suid-Afrika.
Ooreenkomste bestaan tussen die twee lande se klimaatstoestande omdat hulle op dieselfde breedtegraad lê.
“Die negatiewe IOD verhoog die kans op bonormale winter- en lentereënval vir ’n groot deel van Australië. Die voorspelde see-oppervlaktemperatuurpatroon in die tropiese Stille Oseaan is steeds tot voordeel van gemiddelde tot bogemiddelde winterreën vir (veral) die oostelike dele van Australië.”