TEGNOLOGIE HELP OOS-KAAP VEG TEEN SPRINKANE
GEORUIMTELIKE stelseltegnologie word deur Agri Oos-Kaap ingespan teen die sprinkaanswerms wat steeds in die provinsie woed.
Volgens mnr. Günther Pretorius, bestuurder van ekonomie en natuurlike hulpbronne van Agri Oos-Kaap, gebruik die organisasie nou die verslag-en-moniteringsplatform EarthRanger. Dit verskaf insigte oor die beweging van bruinsprinkane sodat swerms beter bekamp kan word.
“Ons het EarthRanger by ons 24-uur-beheerkamer ingesluit. Dit help met die rekordhouding van sprinkaanswerms en om toekomstige uitbrekings te monitor en te voorspel.”
Die monitorinstrument word onder meer vir bewaringsdoeleindes gebruik. Die Voedsel-en-landbou-organisasie (VLO) van die Verenigde Nasies het dit in 2020 gebruik as rapporteringsplatform om verwoestende woestynsprinkaanswerms in Ethiopië en Somalië te bekamp. Luidens EarthRanger
se webblad was dit die eerste keer dat die VLO en lande georuimtelike stelsels gebruik het vir die lugbekamping van die sprinkane. Lugtuie kon baie doeltreffender aangewend word om swerms te verminder, hul verspreiding te keer, en die verskuiwing daarvan na ander vastelande te voorkom.
Die voedselveiligheid van 34 miljoen mense is verseker en $1,5 miljard se verliese aan grane en melk is voorkom.
Volgens Pretorius kan boere die voorkoms van sprinkaanswerms by Agri Oos-Kaap aanmeld deur die nodige GPS-koördinate te verskaf. Agri Oos-Kaap se beheerkantoor vang dan die inligting (onder meer die stadium waarin die swerm is) op die EarthRanger-databasis vas.
Sodoende kan voorspel word waarheen swerms verder gaan beweeg. Agri Oos-Kaap het die platform onlangs aan Agri SA bekend gestel vir moontlike gebruik in ander provinsies.
Groot swerms sprinkane het boere in Februarie en Maart in die omgewing van Jansenville, Steytlerville, Klipplaat en Willowmore oorweldig. Swerms het daarna na Pearston en Somerset-Oos versprei.
“Daar is tans geen kwantitatiewe syfers wat bepaal watter gebiede die ergste geraak is nie.”
Pretorius sê die digtheid en grootte van vanjaar se swerms was die ergste nóg in die OosKaap. “Swerms van 50 ha tot 100 ha groot is aangemeld. Dit is werklik groot swerms.”
Die Oos-Kaapse departement van landelike ontwikkeling en grondhervorming het onlangs aangekondig dat die nasionale departement van landbou, grondhervorming en landelike ontwikkeling ’n gesamentlike bedryfsentrum byeengeroep het.
Die provinsiale departement het ’n veldtog begin om boere in te lig oor die bruinsprinkaan en die bekamping daarvan. Agri Oos-Kaap help onder meer die nasionale departement met die koördinering en aanmelding vir die bekamping daarvan.
“Ons is in voortdurende kommunikasie met die bestaande bekampingspanne op die grond en ons koördineer en help waar ons kan.”
Daar word weekliks met die nasionale en provinsiale departement vergader.
Die nasionale departement is ingevolge die Wet op Landbouplae (Wet 36 van 1983) verantwoordelik om sprinkaanuitbrekings te bekamp. Volgens Pretorius het die departement twee helikopters wat in gebiede spuit waar groot swerms ervaar word. Die werksgebied word bepaal deur die grootte van swerms.
Die nasionale departement verskaf onder meer plaagdoder vir grond- en lugbekamping, asook toerusting. Agri Oos-Kaap het ook die departement bygestaan om plaagdoders aan te koop via Agri SA se ramphulpfonds.