WAPENS: UITSPRAAK VERWELKOM

Die VF Plus verwelkom die

Grondwethof se uitspraak wat bepaal dat wettige vuurwapeneienaars wie se vuurwapenlisensie verval het en waar die eienaars nie binne 90 dae aansoek om hernuwing gedoen het nie, nou wel om ’n nuwe lisensie kan aansoek doen. Dit is ’n belangrike uitspraak in die guns van vuurwapeneienaars in Suid-Afrika.

Mnr. Bheki Cele, minister van polisie, was nog altyd teen private vuurwapenbesit gekant. Sy standpunt was dat mense onwettig in besit van hul vuurwapens sou wees indien lisensies verval het en daar nie binne die spertyd van drie maande aansoek om hernuwing gedoen is nie.

Dit was in werklikheid niks anders as ’n poging om die publiek te ontwapen nie. Die Grondwethof het die minister met dié uitspraak bloedneus gegee en het die reg op private vuurwapenbesit bevestig. Die uitspraak het Cele nie net verkeerd bewys nie, maar dui ook daarop dat die minister misbruik gemaak het van sy magte en sy eie vertolking van die wet.

Ek het reeds in 2017 ’n privatelid-wetsontwerp by die parlement ingedien waarin hierdie aangeleentheid behandel is. My voorstel was waar ’n vuurwapenlisensie verval, moet hernuwing plaasvind soos in die geval van ’n motorlisensie wat verval. Die persoon bly eienaar van sy motor of vuurwapen en betaal ’n boete vir die tydperk dat die lisensie agterstallig is.

Hierdie Grondwethof-uitspraak bevestig die doel van dié privatelid-wetsontwerp se standpunt en die geldigheid daarvan.

Die VF Plus moedig vuurwapeneienaars aan om dadelik aansoek te gaan doen om ’n nuwe lisensie indien hul lisensie verval het. Die polisie het ingevolge die Grondwethof-uitspraak nie ’n ander keuse nie as om die aansoek te verwerk. DR. PIETER GROENEWALD Leier, VF Plus