DÍS HOEVEEL BOERE KORT OM INMAAKFABRIEK OOR TE NEEM
’n Konsortium vrugteboere kort R200 miljoen tot R300 miljoen om Langeberg & Ashton Foods (L&AF) oor te neem.
Tiger Brands het op 9 Junie skokgolwe deur die Langeberg-gemeenskap gestuur met sy aankondiging dat hy dié fabriek wil sluit. Dit volg ná byna twee jaar se gesprekke met onder meer ’n groep van 160 vrugteboere wat aangedui het hulle wil die fabriek koop.
Intussen het inmaakvrugteboere ’n beroep op die regering gedoen om te help keer dat die fabriek gesluit word. Sowat 6 000 plaas- en fabriekswerkers se heil hang van dié fabriek op Ashton af.
Mnr. Jacques Jordaan, uitvoerende hoof van die Inmaakprodusentevereniging (IPV), sê as die uitkringeffek op gesinne en sakeondernemings in ag geneem word, kan die syfers met vier of vyf vermenigvuldig word.
Bykans 2 250 ha boorde met onder meer taaipitperskes en Bulida-appelkose, wat slegs vir inmaak geskik is, sal uit die bedryf verdwyn as daar nie meer ’n verwerkingsaanleg is nie. Die finansiële toekoms van ongeveer 300 boere is in die weegskaal.
L&AF is die grootste vrugte-inmaakfabriek in SuidAfrika en verwerk tot 60% van alle inmaakvrugte.
Boere wat belang stel om die fabriek oor te neem, het sedert verlede jaar elkeen R1 000 per ton vrugte wat hulle lewer, aangebied om geld bymekaar te maak om die fabriek te behou. Volgens boere kort hulle egter nog R200 miljoen tot R300 miljoen se ekwiteit voordat hulle by banke kan gaan aanklop om verdere finansiering.
ROUAN VERWEY skryf:
Daar is meer agter hierdie storie as wat dit op die oog af lyk. Tot onlangs was hulle vasbeslote om alles in die gebied op te koop, net om alles nou te sluit? Ek meen goeie, ondersoekende joernalistiek is nodig. Diegene wat geraak word, moet toegelaat word om die fabriek teen ’n redelike prys terug te kry.
GERHARD VAN DER WESTHUIZEN skryf: Met al die sterk vakbonde daar buite is dit nie meer maklik om te boer en te koop nie.
JOHAN SWANEPOEL skryf: Ja, nog ’n plek wat probleme het. Gaan kyk maar — dit is arbeidswette en werkersvakbonde.
JUSINA LOUWRENS skryf: Dit is hartseer.
CORNELIS POTGIETER skryf: Koo (se vrugteprodukte) is so lank ek leef, deel van ons uitsoekprodukte op die rak. Dit is ondenkbaar wat kruideniersaankope daarsonder sal wees. Daar moet ’n oplossing wees!
HENDRIK MEYER skryf: Skarefinansiering?
MARINDA MEINTJES antwoord: Het ek ook gedink. Of as boere-organisasies oor Suid-Afrika heen 300 boere kan kry wat elk ’n miljoen rand insit, is die konsortium daar.
NATIE FERREIRA skryf: Baie interessant. Die fabriek het aan die boere behoort, toe besluit hulle om dit te verkoop, en nou wil hulle dit terughê. Gierigheid het die boere hul kinders se toekoms gekos.