CHINA-VERBOD PLAAS DEMPER OP WOLSEISOEN
SUID-AFRIKA se posisie as wêreldleier in die lewering van volhoubare wol is tydens die pas afgelope 2021-’22-wolseisoen oorskadu deur China se verbod op die invoer van Suid-Afrikaanse wol.
Volgens mnr. Isak Staats, hoof van wol en sybokhaar by BKB, was Suid-Afrika in die seisoen die wêreld se grootste verskaffer van gesertifiseerde wol, en is goeie premies op dié wol verdien.
“Suid-Afrika is besig om ’n goeie naam te kry as ’n plek waar jy dié tipe wol kan kry.”
Premies is selfs verdien toe die oorgrote meerderheid van die Suid-Afrikaanse wol bestem vir China nie verkoop kon word nie.
China het, net soos in Februarie 2019, aan die begin van April ’n verbod op die invoer van alle Suid-Afrikaanse produkte afkomstig van diere met gesplete hoewe geplaas weens die uitbreking van beken-klouseer.
Wolveilings het egter steeds voortgegaan, en kopers het, soos tydens 2019 se verbod, aangehou om wol vir hul klante in China te koop, en dit dan in Suid-Afrika opgeberg tot tyd en wyl China weer die wol aanvaar.
“As ons nie die situasie binnekort gaan uitsorteer nie, gaan dit rampspoedig wees; 70% tot 80% van ons wol gaan na China toe.”
PROBLEEM NIE OPGELOS
Staats sê een van die kwessies is dat die huidige bek-en-klouseeruitbreking nie ’n probleem is wat lyk asof dit opgelos word nie, met uitbrekings in verskillende areas wat steeds nie in bedwang is nie.
“Die situasie in China raak ook nie beter nie. Die vorige keer (tydens die 2019-uitvoerverbod) het net die Chinese doeane-owerhede ’n verbod op uitvoer geplaas en dié keer is dit ook hul departement van landbou.”
China het voortgegaan om ’n verbod op Suid-Afrikaanse wol te plaas ondanks die goedgekeurde maatreëls wat
Suid-Afrika ingestel het en waarop die twee lande ooreengekom het. Na sy mening stem China se drastiese stap ooreen met sy zero-covid-19-beleid wat dié land tans aanwend om die verspreiding van die virus hok te slaan.
MINDER WOL
Wol van goeie gehalte is vanjaar gelewer, maar wollewering is 6% minder vergeleke met die vorige seisoen.
“Die droogte het ons vanjaar kom byt, maar ons verwag ’n taamlike groei in produksie in die jaar wat kom.”
Op die laaste veiling, wat op 8 Junie aangebied is, het die Cape Wools-aanwyser vir RWS-wol gesluit op ’n skoonprys van R180,07 per kilogram en nie-RWS-wol op R164,91 per kilogram.
Staats sê daar is die afgelope seisoen veral goeie pryse vir fyn wol betaal, en soms is hoër pryse as in 2018 betaal toe die prys ’n hoogtepunt beleef het.
Europese lande soos die Tsjeggiese Republiek, waar een van die topkopers, Modiano, se meule geleë is, het steeds voortgegaan om Suid-Afrikaanse wol te koop, met wol wat ook na Italië, Egipte en self Uruguay gestuur is.
Een struikelblok is egter dat Europese meulenaars tans baie besig is en reeds vir die volgende 10 tot 12 maande vol bespreek is.
Daarby vra Europese markte ander vrae as China. Hulle is meer toegespits op volhoubaarheid. “Om besigheid te doen in China is relatief maklik.” Nog ’n kwessie met die verbod is dat China tans die enigste mark vir kommunale wol is.