Omnia wil ‘volhoubaar en gedissiplineerd’ groei
OMNIA HOLDINGS se stewige jaarresultate maak die pad oop vir dié gediversifiseerde chemiese maatskappy om internasionaal te groei. Maar dit sal volhoubaar en gedissiplineerd geskied, sê mnr. Stephan Serfontein, finansiële direkteur.
Daarby sien die groep, wat byna die helfte van sy inkomste uit plaaslike en internasionale landboubedrywighede verdien, dat gebeure soos die oorlog in Oekraïne sy rol verstewig om te verseker dat Suider-Afrika voldoende voedsel kan produseer.
In die boekjaar tot Maart Omnia Holdings se landbou-afdeling die grootste netto toename in omset van 44% tot R11,2 miljard getoon. Sy bedryfswins van R1,2 miljard het meer as verdubbel.
Dié wins is veral aan hoër verkope te danke, sê Serfontein. “Spesifiek in Suid-Afrika was daar ’n groot vraag danksy baie goeie landboutoestande, terwyl die landbou-kommoditeitsiklus in die afgelope jaar hoër beweeg het, wat ons wins ook verhoog het.”
Goeie verkope is ook behaal in buurlande, spesifiek Zambië.
Mosambiek het weer ’n groter vraag na spesialiteitskunsmis vir hoëwaarde-gewasse gehad.
LOGISTIEK EN UITVOER
Skeepsvrag word steeds deur die uitwerking van die pandemie ontwrig, en logistieke vertragings na groot internasionale klante het die groei van Omnia se biostimulant-bedrywighede in Australië belemmer.
“Dié vraag na biostimulante is tans ’n groot, groeiende mark wêreldwyd.”
Die groep het bedrywighede in meer as 25 lande. Dit is veral sy oorsese mark vir biostimulante en die verskaffing van mynbou-oplossings wat geleenthede bied in lande soos Australië, Kanada en Indonesië.
Serfontein sê die oorlog in
Oekraïne het hulpbronpryse opgestoot en ’n groot internasionale vraag na landbouprodukte geskep. “Ek meen regerings in die algemeen is bekommerd oor voedselsekerheid. Ons geintegreerde bedryfsmodel, spesifiek ons voorsieningsketting
en vervaardigingsaanlegte, plaas Omnia in ’n sterk posisie om hieruit voordeel te trek.”
Hy meen Omnia Holdings het ’n rol om te speel, spesifiek in Suider-Afrika om boere te ondersteun. “Ek dink daar gaan meer druk kom op produksiekoste, veral as ons kyk na wat met Eskom gebeur, asook stygende petrol- en dieselpryse. Dit het ’n impak aan die landboukant. Omnia moet verseker dat hy boere bystaan om winsgewend te wees, maar ook dat die streek nie voedseltekorte ontwikkel nie.”
KONTANT
Volgens Omnia Holdings se resultate vir die boekjaar tot einde Maart het hy kontant van R2,4 miljard beskikbaar.
Die wins ná belasting uit voortgesette bedrywighede het met 80% tot R1,1 miljard gestyg. Sy wesensverdienste per aandeel is 86% hoër as ’n jaar tevore op R6,72.
Aandeelhouers in dié 70 jaar oue maatskappy sal aan die einde van die boekjaar R1,4 miljard ontvang danksy ’n dividend van R2,75 per gewone aandeel en R5,25 per spesiale aandeel.
“Dit is nie ons voorneme om op lang termyn op die kontant te sit nie, ons gaan dit aanwend vir groeigeleenthede. Indien daardie geleenthede nie oor ons pad kom nie, gaan ons bykomende kapitaal aan ons aandeelhouers terugbesorg.