KEN ONKRUID EN PLANTSIEKTES UIT MET JOU SELFOON
Boere kan nou danksy BASF se xarvio® Scouting-toepassing makliker knaende siektes of onkruid by hul gewasse uitken. Suid-Afrikaanse boere kan die toepassing gratis op hul slimfoon laai en gebruik om probleme in die veld te identifiseer en te dokumenteer.
“Met die inligting kan praktiese probleme meer presies geïdentifiseer en besluite vinniger geneem word oor die geskikte behandeling,” sê mnr. André Pretorius, bemarkingsbestuurder van BASF Suid-Afrika.
Die toepassing gee gebruikers toegang tot vinnige en akkurate identifikasie van belangrike onkruid of siektes wat probleme veroorsaak by bekende gewasse soos graan, mielies, sojabone en sitrus.
’n Gevorderde plantmodelleringsplatform, deur landboukundiges en boere ontwikkel, dryf dit aan en gebruik intydse algoritmes wat aanhoudend die funksionaliteit en presisie van die toepassing verbeter danksy masjienleer en die uitruil van data.
Die toepassing se akkuraatheid sal aanhoudend verbeter namate boere dit gereelder gebruik en foto’s van gewasse, onkruid en siektes oplaai.
’n Foto van die beskadigde of siek plante word op die slimfoon geneem en opgelaai. Só kan stres dadelik waargeneem of blaarskade beraam word. Danksy ’n unieke gemeenskapsgebaseerde radarfunksie word gebruikers in staat gestel om gevare en moontlike risiko’s in die omliggende veld te sien, waarop hulle dan betyds kan reageer.
Die toepassing word bestempel as een van die mees outomatiese, omvattendste agronomiese probleemidentifiseerders ter wêreld.
Dit kan meer as 400 verskillende onkruide identifiseer en skade eien wat veroorsaak word deur meer as 400 siektes en plae, asook voedingstekorte by meer as 60 gewasse waarneem.
Prys: Gratis (besoek Google Play vir Android-fone of die App Store vir Apple-fone)