Hartklop van die platteland
BKB Handel lewer gehalteprodukte, uitstekende diens en speel ’n groot rol in die infrastruktuur en ritme van die dorpe waar sake gedoen word.
BKB Handel is met sy 52 takke en drie vulstasies ’n bekende gesig op dorpe reg oor die land. Van dié 52 takke is 24 en al drie vulstasies in die Oos-Kaap. Dié winkels bring kundigheid, landbouprodukte en werkgeleenthede na die dorpe waar dit geleë is. Die takke is egter meer as net landbouwinkels.
“Dit word gesien as ’n plek waar boere bymekaarkom en stoom afblaas,” sê mnr. Frikkie Mulder, BKB-streeksbestuurder Oos-Kaap: Suid. “By baie van ons takke is daar ’n koffiestasie met banke waar mense kan sit en koffie drink.”
Hoewel BKB landbougoedere nader aan die plase bring, is dié handelstakke nie net vir boere nie. “Op die kleiner Oos-Kaapse dorpies is ons eintlik die algemene handelaar waar almal in die gemeenskap kan kry wat hulle wil hê.”
’n Klant wat by ’n BKB-winkel instap, sal dus alle landboubenodighede op die rakke sien, soos veevoer, veeartsenyprodukte, dierehanteringstoerusting, saad, kunsmis en besproeiingstoerusting. Daar is ook ander produkte, soos kruideniersware, boumateriaal, hardeware en selfs geskenke.
By 45 van BKB se persele kan die publiek 50 ppm-diesel teen groothandelpryse koop.
Maar jy hoef nie naby ’n winkel te wees om by BKB inkopies te doen nie. In 2021 het dié maatskappy sy aanlyn winkel, bkbonline.co.za, bekend gestel. Hierdie winkel word vanaf BKB se verspreidingsentrum in Gqeberha bestuur. Een van die grootste produklyne hier beskikbaar is troeteldiergesondheidsprodukte en -kos.
“Die groot sukses van ons aanlyn winkel is dat enigeen in Suid-Afrika nou by BKB kan koop, al woon jy nie naby ’n handelstak nie. Die pakkie word per koerier by jou afgelewer,” sê me. Sarieth Maree, BKB-streeksbestuurder OosKaap: Noord.
Die verspreidingsentrum in Gqeberha verskaf ook skeerbenodigdhede en wolsakke aan ander landboubesighede in die land, asook aan Namibië en Lesotho.
“Ons is die verspreiders van Ukal- en Heinger-produkte wat van Switserland af ingevoer word. Hierdie produkte is veral gemik op dierehantering en skeer,” sê Mulder.
Hierdie landwye teenwoordigheid gee BKB ’n aansienlike voordeel bo sy mededingers.
“BKB is by die meeste van ons verskaffers onder die topvyf verspreiders, wat beteken ons kan die koopkrag van al 52 takke saam gebruik om prysmededingend te wees,” sê Maree.
Vir BKB is sy werknemers ’n belangrike pilaar waarop sy sukses rus, daarom word heelwat belê in die opleiding en bemagtiging van sy personeel.
“Klante wat by ons takke aandoen, kan goed ingeligte, vriendelike personeel verwag wat ’n uitstekende, professionele diens lewer,” sê Mulder.
Hy voeg by dat BKB se personeel deurlopende opleiding ontvang deur produkverskaffers en erkende besigheidskole.
Topveeartse, soos dr. Faffa Malan, is betrokke by die opleiding van veral die verkoop van dieregesondheidprodukte.
Met die lewe wat wil-wil terugkeer na normaal ná die omwenteling wat covid-19 gebring het, is BKB se handelstakke in die Oos-Kaap se oë ferm op die toekoms gerig.
“BKB is deurlopend besig om te kyk hoe ons die handelstakke toegankliker kan maak vir klante. Ons kyk ook na moontlikhede waar nuwe takke geopen kan word of om bestaande besighede te koop wat waarde kan toevoeg,” sê Maree.
’n Deel van die planne is ook om die handelstakke op Cathcart, Willowmore en Burgersdorp, asook die vulstasie op Burgersdorp op te kikker.
“Dit beteken die takke word binne en buite oorgedoen in BKB se nuwe voorkoms, met nuwe produkreekse wat ingesit word,” sê Maree.
“Dis vir ons belangrik dat klante ons sien as ’n alles-ineen-winkel wat in al hul behoeftes voorsien,” sê Mulder.