NUWE MOONTLIKHEID WINK
Danksy die toenemende vraag na sonpanele raak verskaffers se pryse mededingender, en tegnologie maak die panele ál doeltreffender.
Luidens die webwerf extremetech.
com kan ’n paar verstellings in sonpaneeltegnologie uitsette tot twintigvoudig verbeter. Vir groter doeltreffendheid word dun film oor panele geplaas. Hierdie film omskep ultraviolet- (UV) strale selfs op bewolkte dae in energie. Hierdie film word uit groente- en vrugtereste vervaardig, wat dit ekologies vriendeliker maak.
Mnr. Carvey Ehren Maigue van die Filippyne het verlede jaar die James Dyson-stigting in Amerika se volhoubaarheidseerbewys ontvang vir dié panele wat hy ontwerp het.
“Net soos in die geval van plante absorbeer die deeltjies (in die film) die son se UV-strale en verander dit in sigbare lig. Die panele kan dan die versamelde lig in elektrisiteit omskakel omdat UV-strale die aarde steeds op bewolkte dae bereik.”
Nog ’n belowende ontwikkeling is die gebruik van ’n termo-elektriese opwekker sodat krag saans deur middel van stralingsverkoeling opgewek kan word. Wetenskaplikes van die Stanford-universiteit in Amerika sê bestaande sonpanele kan goedkoop aangepas word sodat dit die hitte van die son wat sonpanele bedags absorbeer, snags teruggestraal deur die verskil in temperatuur tussen die koeler panele en die warmer lug. Hierdie ontwikkeling skakel die noodsaaklikheid van batterye om die opgewekte elektrisiteit op te berg, uit.
Suid-Afrikaners staan ook nie terug as dit by die verbetering van sonpanele kom nie. In 2007 het prof. Vivian Alberts, uitvoerende hoof van die maatskappy Photovoltaic Technology Intellectual Property, ook ’n filmbedekking aangekondig wat saam met plaaslik vervaardige glas gebruik kan word om sodoende die koolstofspoor te verklein.
’n Toename in drywende sonpanele word ook voorspel, wat sal help om die verdamping van water en die groei van alge te verminder, en gevolglik watergehalte sal verbeter.