Integriteit sleutel tot sukses
Maklik, eerlik, direk. Dít is Veilingswinkel se leuse en hy streef daagliks daarna om dit uit te leef.
Vir mnr. Jaco Pretorius, uitvoerende hoof van Veilingswinkel, is die integriteit waarmee dié afslaer sake doen, die geheim agter sy vinnige opgang in die afslaersbedryf. Dié maatskappy het in die wildbedryf met Wildswinkel begin en in 2017 ’n omset van ongeveer R1,5 miljard getoon. “Ek dink ons het dit reggekry om baie vinnig ’n handelsmerk te skep wat vertroue by kliënte gewen het.”
Vandag het die maatskappy drie afdelings: Wildswinkel, Veewinkel en Die Winkel, met Veilingswinkel as die moedermaatskappy. “Veewinkel konsentreer op lewende hawe en Die Winkel behartig masjinerie, toerusting en werktuie.”
Veewinkel maak naam in die lewendehawebedryf, veral deur sy ondersteuning van nuwe rasse, soos die Ankole.
“Ons bied die afgelope twee jaar met groot sukses die nasionale Ankole-veiling aan. Vanjaar se veiling het ’n omset van R21 miljoen gehad. Ek meen dit is een van die grootste veeveilings wat nóg aangebied is.”
Dit gaan egter vir Pretorius oor meer as net dié tipe prestasies. “Dit is vir ons belangrik om ’n platform te skep waar kopers waarde kry en die verkopers maksimum blootstelling kry.”
’n Groot deel van Veilingswinkel se sukses is te danke aan sy wêreldklas- aanlyn platform.
“Ons het dit in 2015 ontwikkel, lank vóór die covid-19-pandemie. Dit vorm ’n kerndeel van ons besigheid en is gebruikersvriendelik. Dit is beskikbaar op die web en slimfoontoepassing en bereik baie klante,” sê Pretorius. “Mense het groot vertroue in ons aanlyn platforms en hulle bie van enige plek in Suid-Afrika.”
Benewens integriteit en tegnologie wat Veilingswinkel kenmerk, is die diens wat hy lewer ook wêreldklas. Veilingswinkel het ervare bemarkers met uitstekende kennis van hul onderskeie gebiede.
“Ons is trots om te wees waar ons is. Die besigheid toon uitstekende groei en ons is gereed om hande te vat met ons klante om ’n volhoubare pad met hulle in die bedryf te stap.”