Passie bring sukses
Vleissentraal pak veilings professioneel en met geesdrif aan en dit lei tot sukses vir dié maatskappy en sy kliënte.
Wanneer Vleissentraal ’n veiling aanbied, is dit op ’n ander vlak. Dít was die geval op die nasionale veiling vir die Drakensberger-beestelersgenootskap vanjaar.
Dit het alles begin met die bul Gransmunt Puma CL 19-17 van mnr. Carel Nel van die plaas Helderfontein, Brandfort. Hy het geskiedenis gemaak deur die eerste Drakensberger te word wat die nasionale Elite-bulgroeitoetsklas van Vleissentraal en Stamboek op die Bloemskou gewen het.
Kort daarna moes Vleissentraal vir die eerste keer die Drakensbergers se nasionale veiling aanbied. Dit is toe dat mnr. Anton Vos, besturende direkteur, ’n blink gedagte gekry het.
“Ek het besluit om ’n bietjie oemf van oom Carel se bul te maak deur ’n saadaandeel op die veiling aan te bied.”
Die woord is op sosiale media versprei en die uitkoms van die oorweldigende reaksie wat Vleissentraal gekry het, was tweeledig. Eerstens het Vos besluit dat die mag van sosiale media in die toekoms nog meer benut moet word. Tweedens het die Drakensberger-beestelersgenootskap beleef hoe dinge lyk as dit op ’n ander vlak aangepak word.
Vir Vos en Vleissentraal was dié veiling ’n hoogtepunt van die jaar. “Om die geesdrif te sien waarmee my personeel dit aanbied. Hulle is trots op die werk wat hulle doen,” sê Vos. “Ook om oom Carel te sien met trane in sy oë, want dit was vir hom so spesiaal. Dít is die passie van die bedryf.”
Vleissentraal behartig 17 van die nasionale veilings – al die groot veilings word deur dié afslaersmaatskappy aangebied. Hierdie veilings word tereg beskou as ’n vertoonvenster van wat Vleissentraal bied. Dit maak ook van hom ’n groot naam in die afslaersbedryf.
DIE PAD VORENTOE
“Vleissentraal is nasionaal goed posisioneer om die handelsmerk en die beesbedryf vorentoe te neem.”
Een van die gebiede waarna hy ernstig kyk, is bemarking op sosiale media.
“Vleissentraal presteer baie goed hiermee tot dusver. Ons streef daarna om vir die kliënt die beste diens te gee deur die nuutste tegnologie op sosialemedia-platforms te gebruik.
“Die lekkerte van Vleissentraal is dat ons ’n ou maatskappy is met kopers en verkopers wat landwyd versprei is, dus is ons databasis baie groot.”
Vir ’n bedryf wat die impak van dieresiektes, diefstal en kieskeurigheid van verbruikers vinnig voel, is dit verstaanbaar dat naspeurbaarheid groot klem kry by Vleissentraal.
Volgens Vos ondersoek Vleissentraal die moontlikheid om te belê in tegnologie wat ’n bees se neusafdruk neem. Sodoende word twyfel oor die dier se identiteit uitgeskakel, en word sy welstand beskerm deur weg te beweeg van praktyke soos brandmerke. Die millenniër-verbruiker wat bekommerd is oor hormone en antibiotika in sy steak, kan ook gerusgestel word.
“Vleissentraal is nou amper 100 jaar oud en ons wil seker maak ons bly relevant.”
Nog ’n gebied waarna Vleissentraal suksesvol uitgebrei het, is plaasverkope.
“Ons het ’n paar jaar gelede met Vleissentraal Eiendomme begin en dit presteer regtig goed. Dit was lekker om sien hoe ons handelsmerk deur die eiendomme blootstelling op vanjaar se Nampo gekry het.”
Die jaar was tot dusver goed vir Vleissentraal. “Vee is duur, dus vaar ons goed. Ons omset is seker sowat 10% beter as die vorige jaar, maar dit kom nie sonder probleme nie.”
Bek-en-klouseer is een daarvan. Vir Vos is dit ’n kwessie wat reg deur die waardeketting aangepak moet word, nie net op veilings nie.
“Daar moet ’n aanvaarding van biosekerheid deur almal wees – van die plaas na die veiling, na die voerkraal, na die abattoir. Dit is al hoe ons die bedryf gaan red.”