WELSLAE MET NUWE KASTEROLIE-TIPE
’n Nuwe kasterolie-tipe — so taai soos sekelbos — is vanjaar met groot welslae op die Springbokvlakte geplant. Ondanks die droogte word ’n opbrengs van 1 500 pond (680 kg) per morg (0,86 ha) verwag. Vir dié boere word ’n blink toekoms voorsien.
Die plaaslike produksie en uitvoer van kasterolie kan sommer nog baie opgestoot word. Baie boere besef egter nog nie die waarde van kasterolie as kontant- en wisselbougewas nie. Dit is nie net ’n geharde plant wat droogtes goed kan weerstaan nie, maar die prys bly ook stabiel genoeg om aan die boer ’n goeie inkomste te bied.
In die ná-oorlogse jare het die wêreldhandel in kasterolie en kasteroliesaad vinnig toegeneem. Sedert 1955 het dit min of meer stabiel gebly op ongeveer 300 000 ton (saad en olie op ’n saadgrondslag). Tot dusver was Suid-Afrika se aandeel van die wêreldmark egter baie gering, en volgens mnr. A.Z. de B. Wium van die afdeling ekonomie en markte kan die plaaslike produksie en uitvoer aansienlik verhoog word.
In die huidige seisoen het die oppervlakte onder kasterolie in Suid-Afrika taamlik toegeneem, en hoewel ernstige droogtetoestande in Noord-Transvaal (Limpopo) — waar dié gewas hoofsaaklik verbou word — geheers het, word die huidige oes op ongeveer 100 000 sakke van 200 pond (90,72 kg) geskat. Boere kry tans R70 vir ’n ton gedopte pitte.
Die Landbouweekblad het onlangs ’n geesdriftige kasterolieboer op die Springbokvlakte besoek — mnr. Karel Steenkamp van Smaldeel by Tuinplaas wat vanjaar ’n nuwe tipe met groot welslae op die proef gestel het.
Hy het die nuwe soort vier jaar gelede in wilde opslag raakgeloop. Omdat dié plante verbasend goed bestand was teen droogte, goed gedra en mooi kerse gevorm het, het hy met die saad begin proefnemings doen.