DIÉ WEEK IN DIE LANDBOU

SITRUSSKANDE

Vraghouers met Suid-Afrikaanse sitrus is glo kort voor druktyd by hul aankoms in die Europese Unie (EU) teruggehou, ná die skielike instel van ’n nuwe reël oor kouebehandeling in Junie wat spesifiek op Suid-Afrikaanse lemoene van toepassing is. Mnr. Justin Chadwick, uitvoerende hoof van die Suider-Afrikaanse Sitruskwekersvereniging (SASKV), sê die SASKV verneem dat vraghouers met sitrusvrugte, nie net lemoene nie, met hul aankoms in die EU teruggehou word. “Dit is hoekom die Wêreldhandelsorganisasie spesifiek ’n proses van ses maande vir die inwerkingtreding van nuwe maatreëls vereis,” sê hy. Die EU-reël is ingestel terwyl vragte plaaslike vrugte ter see was. Lees meer by bit.ly/3PuBKDQ.

AUSSIES KRY BEK-EN-KLOU-SKOK

Ná virusdeeltjies van bek-enklouseer in twee afsonderlike gevalle in Australië gevind is, het die land sy beskermingsmaatreëls op internasionale lughawens verskerp. ABC berig dat reisigers wat die land van Indonesië af binnekom by Cairns en

Darwin, oor saniteringsvoetmatte met sitroensuur loop om hul skoene te ontsmet. ’n Ernstige uitbreking van bek-en-klouseer kom sedert Mei in Indonesië voor. Virusdeeltjies van bek-enklouseer én Afrika-varkpes is in ingevoerde vleis in winkels in

Melbourne gevind. Indien beken-klouseer in Australië uitbreek, kan dit die rooivleisbedryf, wat groot volumes uitvoer, skade van AU$80 miljard (R942 miljard) berokken. Die land is sedert die laat 1800’s vry van dié siekte. Lees meer by bit.ly/3onZDBa.

KOS RAAK ’N LUUKSE

Voedselprysinflasie het in Junie 9% op ’n jaargrondslag bereik, luidens data wat verlede maand deur Statistieke Suid-Afrika bekend gemaak is. Die inflasiekoers vir verwerkte voedsel het op 11% gestaan, en dié vir onverwerkte voedsel op 7%. Die prysinflasie vir olies en vette het 32,5% beloop, dié vir brood en grane 11,2%, vleis 9,5% en groente 5,6%. Die inflasiekoers vir elektrisiteit en ander energiebronne was 14,5%, wat amper dubbel die verbruikersprysindeks was (7,4%).

MEER BOTTELS

Die voltooiing van ’n uitbreidingsprojek van R1,5 miljard by Ardagh Glass Packaging South Africa (voorheen Consol Glass) se aanleg op Nigel het dié glasmaker se produksiekapasiteit verdubbel. Consol Glass is in April vanjaar deur die Luxemburgse verpakkingsvervaardiger Ardagh Group vir R1 miljard gekoop. Die uitbreidingsprojek, wat 150 regstreekse werkgeleenthede geskep het, verdubbel produksiekapasiteit danksy ’n nuwe smeltoond en produksielyne. Lees meer by bit.ly/3z03Ek7.