TRANSVALERS EET VARS DRUIWE IN DIE WINTER
Vars druiwe in die hartjie van die winter – dít is jongste prestasie van die Noord-Transvaalse Laeveld. Dit het deesdae in Transvaal al byna spreekwoordelik geword om te sê dat die noorde altyd met iets nuuts vorendag kom, want in die afgelope jare het hierdie streek die een verrassing ná die ander opgelewer.
Dit was sommer nou die dag toe die waarde van NoordTransvaal as ’n beesboerderystreek eers werklik op die voorgrond getree het. Met die bou van ’n dam in die vrugbare Njelelevallei het groente, sitrus en subtropiese vrugte in ’n ál dikker stroom van agter die Soutpansberg na die vernaamste markte in die Unie begin vloei. En nou eindelik iets wat ’n mens in baie minder ander lande van die wêreld kan regkry – vars druiwe in die hartjie van die winter!
Enkele jare gelede was die aankoms van ’n klein besending druiwe in die middel van die winter op die Johannesburgse mark voorbladnuus. Hierdie druiwe het uit die Njelelevallei gekom en hulle was die voorloper van ’n bedryf wat nog groot moontlikhede inhou.
Aanvanklik het mense skepties teenoor hierdie winterdruiwe gestaan en daar is gesê dat dit maar net ’n buitengewone seisoen of ’n frats was. Ander het gesê dat die smaak nooit goed sal kan vergelyk met dié van die somerproduk nie, want wie het nou al ooit van druiwe in die winter gehoor.
Vandag, ná net ’n paar jaar, het winterdruiwe nie net ’n werklikheid geword nie, maar dit is vinnig op pad om een van die vernaamste boerderyvertakkings agter die Soutpansberg te word.
Wanneer die geskiedenis van dié winterduifboerdery eendag geskryf word, sal die naam van een man daarin in hoofletters verskyn – mnr. Bertie Knott. Toe ’n verteenwoordiger van Die
Landbouweekblad onlangs sy plaas besoek het, was hy verstom om niks minder nie as 25 morg (21,4 ha) onder verskillende druiwe aan te tref, en nog meer winderd word aangeplant.
Hoewel in die middel van die winter het die wingerd vol swaar trosse gehang, byna gereed vir versending na die mark.