Hittegolwe kan Noorde se somergrane swaar tref
HITTEGOLWE wat die afgelope tyd oor verskeie dele van Amerika, Europa en China voorgekom het, het kommer laat toeneem oor die nadelige gevolge daarvan op somergewasse wat in ’n vroeë groeifase is.
Luidens ’n droogteverslag van die Amerikaanse departement van landbou het 45% van dié land teen middel Julie droogte ondervind en 88 miljoen ha landbougewasse word nadelig geraak. Die droogtesituasie het sedert middel Junie met 15% versleg.
Volgens nog ’n verslag het erge droogtetoestande oor die Midde-Weste uitgebrei en 27% van dié gebied waar die Amerikaanse mieliestreek geleë is, gaan nou onder droogte gebuk. Matige tot ernstige droogte kom voor in 70% van Michigan, 57% van Iowa en 46% van Minnesota.
Mnr. Wandile Sihlobo, hoofekonoom van die landbousakekamer Agbiz, wys op ’n gesamentlike verklaring van die Voedsel-en-landbouorganisasie, Internasionale Monetêre Fonds, Wêreldbank, Wêreldvoedselprogram en die Wêreldhandelsorganisasie wat waarsku dat 345 miljoen mense in 82 lande se lewensomstandighede deur voedseltekorte bedreig word. Regerings word gevra om hul lande se landbouproduksie te ondersteun.
Sihlobo sê die Amerikaanse departement van landbou is in sy jongste opname nog optimisties oor die wêreld se vraag- en aanbodsituasie.
Daarvolgens sal die wêreld se graanproduksie in 2022’23 nie beduidend laer wees nie. In die Julie-opname is die wêreld se mielie-oes geraam op 1,18 miljard ton, wat net 3% laer is op ’n jaargrondslag.
“Hierdie ramings het egter nog nie die gevolge van die hittegolwe in ag geneem nie.”
TE OPTIMISTIES?
Mnr. Stephen Krüger, boer van Viljoenskroon wat daagliks oor die wêreld se weersomstandighede verslag doen op die gespreksgroep Basis-Diff, stem met Sihlobo saam dat die voorspellings dalk te optimisties is. Hy meen dit sal eerder afwaarts as opwaarts aangepas word.
“Ons moet onthou dat kopers en verkopers verskillende agendas het, en dit bepaal watter inligting beskikbaar is. Daar is egter ook baie propaganda.
“Ek meen in Amerika is die situasie tans op ’n mespunt omdat somergewasse in hul bestuiwingsfase is. Daar is baie keer ook verskille tussen die Europese en Amerikaanse weermodelle wat gebruik word, en soms weerspreek hulle mekaar. Daarom moet ’n mens kyk na die neerslae wat wel voorgekom het, teenoor die voorspellings.”
Krüger sê die droogtetoestande in Europa moet ook nie buite rekening gelaat word nie. “Die grondvogtoestande is nie na wens nie en die Europeërs gaan gebuk onder uiterste toestande.”