’n Boer maak ’n plan: Skryf joune in!

Nampo Kaap is om die draai, en dit beteken jy kan weer jou boereplan inskryf.

Die gewilde boerepatent-kompetisie op die Nampo-oesdag buite Bothaville lewer al jare lank uitstekende voorbeelde van boere se vindingrykheid en vergestalt die gesegde van ’n boer maak ’n plan. Sedert Nampo Kaap ook onder die vaandel van Graan SA op Bredasdorp aangebied word, trek die Overbergse uitstalling se boereplanne net soveel aandag. Wie sal ooit die Darling-boer mnr. André Kirsten se rooikatverjaer met ’n sonpaneel en radio wat skape “oppas”, vergeet wat in 2019 soveel aandag gelok het?

Landbouweekblad het in 2018 kragte saamgesnoer met Omnia en Graan SA om die kompetisie aan te bied, wat nou Landbouweekblad Boereplanne heet. Lesers kan ook deur die jaar in Landbouweekblad ,op Landbou.com en in die jaarlikse Landbou Boereplanne-tydskrif oor die nuutste boereplanne lees, waarvan baie op Nampo Kaap te sien sal wees. Vanjaar se skou vind van 14-17 September plaas.

Groot prysgeld is op die spel in vanjaar se kompetisie. Die afdelings waarin jy jou boereplan kan inskryf, is:

■ Nuut. Masjinerie, werktuie en landboutoerusting (rekenaarprogrammatuur, slimfoontoepassings en enige ander tegnologie ingesluit).

■ Gemodifiseerd. Masjinerie, werktuie en landboutoerusting (rekenaarprogrammatuur, slimfoontoepassings en enige ander tegnologie ingesluit).

■ Gereedskap. Alle gereedskap, elektries

én nie-elektries.

■ Huis en tuin. Planne wat in en om die huis gebruik kan word, ook in die kombuis.

■ Ope-afdeling. Enige artikel wat nie hierbo genoem word nie met ’n vervaardigingskoste van minder as R5 000.

Inskrywings kan aan mnr. Wim Venter by e-pos wim@grainsa.co.za of Graan SA,

Posbus 88, Bothaville 9660 gerig word.

Laai die inskrywingsvorm op Landbou.com af( bit.ly/3yL4UYi).

FOTO: LIZA BOHLMANN GEEN RADIOSTILTE HIER. Mnr. André Kirsten van Darling by sy rooikatverjaer met ’n sonpaneel en radio wat ’n betroubare skaapwagter is. Lamverliese weens roofdiere is in die kiem gesmoor deur die nimmereindigende gespeel van die radio snags – en die geheim is glo die regte balans tussen musiek en geselsprogramme.