DIÉ WEEK IN DIE LANDBOU

VERLIGTING?

Die tyd sal nog leer, maar teen druktyd was daar aanduidings dat brandstofpryse in September waarskynlik sou daal. Mnr. Dawie Maree, hoof van inligting en bemarking by FNB Landbou, sê data vir die eerste 10 dae van Augustus dui op ’n oorverhaling op alle brandstofprodukte – R2,41/liter vir diesel met 0,05% swael, R2,36/liter vir diesel met 0,005% swael, R2,68/liter vir 95 oktaan-petrol en R2,54/liter vir 93 oktaanpetrol. Hoewel die olieprys én wisselkoers kan verander, was die olieprys reeds aansienlik laer as die $120/vat wat dit in Junie bereik het.

LAAG

Damvlakke in die Wes-Kaap was teen druktyd heelwat laer as gewoonlik ná teleurstellende winterreënval. Die vernaamste damme in die provinsie was net sowat 75% vol, teenoor 97,2% ’n jaar vantevore. Theewaterskloof, die provinsie se grootste dam, het ’n jaar gelede oorgeloop met die watervlak wat op 101,2% gestaan het, teenoor 76,4% teen druktyd. Ander damme wat aansienlik leër was as ’n jaar gelede, is die Voëlvleidam (63,1% teenoor 87,5%) en Wemmershoek (65,2% teenoor 97%). Mnr. Jannie Strydom, uitvoerende hoof van Agri WesKaap, sê die groot waterskemas se damvlakke is ook op 63% heelwat laer as verlede jaar, toe dit op 77% gestaan het.

AMERIKA FLIKFLOOI

Gesprekke oor die uitbreiding van Amerikaanse handel en belegging in Afrika suid van die Sahara en die toepassing van die wet op groei en geleenthede in Afrika (Agoa) word beoog vir 13 Desember tussen Amerika en senior amptenare van dié lande, volgens me. Katherine Tai, Amerikaanse handelsverteenwoordiger. Dit is dieselfde week dat pres. Joe Biden en sy adjunk, me. Kamala Harris, ’n spitsberaad saam met Afrika-leiers in Washington D.C. beoog. Volgens die Amerikaanse sensusburo het wedersydse handel met dié lande in 2021 $44,9 miljard (R729,6 miljard) beloop, wat 22% hoër is as 2019 se $36,8 miljard (R598 miljard). Direkte buitelandse belegging deur Amerika in die distrik was egter 5% laer as in 2019, teen $30,31 miljard (R492 miljard).

VERSKROEI

Frankryk het vir die tweede keer in minder as ’n maand deurgeloop onder reuseveldbrande te midde van ’n rekorddroogte en ’n tweede hittegolf. Die distrik Gironde het die ergste deurgeloop, berig die New York Times. Mnr. Grégory Allione, voorsitter van Frankryk se brandweerfederasie, het gesê die land is nou nóg kwesbaarder as in Julie, omdat ’n maand van droogte en hitte plantegroei vlambaarder gelaat het. Die brandgevaar sou voortduur deur die herfs. Die Europese woud-brandinligtingstelsel het berig dat amper ses keer soveel natuurlike habitat deur veldbrande vernietig is vanjaar as die jaargemiddelde van 2006 tot 2021.