China-wolverbod werp skadu oor nuwe seisoen
DIE wolbedryf het aangekondig dat wolveilings sal voortgaan vir die 2022’23-seisoen, maar weens die uitvoerverbod na China sal minder bale wol per veiling aangebied word.
Volgens OVK het al die wolmakelaars besluit om voorlopig voort te gaan met veilings, aangesien wol wat vir die Europese mark geskik is, steeds verkoop kan word. Die nuwe veilingseisoen sou op 17 Augustus begin.
China het in April ’n verbod geplaas op die invoer van alle diereprodukte van diere met gesplete kloue van Suid-Afrika, wat vetwol insluit, ná hernude uitbrekings van bek-en-klouseer. Van 70% tot 80% van Suid-Afrika se vetwol word na China uitgevoer.
Die verbod is ingestel ondanks die gesondheidsertifikaat wa tin 2019 tussen China en Suid-Afrika onderhandel en goedgekeur is, waarvolgens wol hittebehandeling ondergaan wat die bek-en-klouseervirus vernietig as dit in wol voorkom.
“Cape Wools en andere soos Agbiz het alles in hul vermoë gedoen, en doen dit steeds, om ’n weg vorentoe te vind. Die Suid-Afrikaanse regering het die Chinese regering amptelik versoek om die verbod op te hef, maar nog geen amptelike reaksie van die Chinese ontvang nie,” sê OVK.
“Ons is in die duister oor wat die Chinese beoog om te doen en of hulle inderdaad enige planne het.”
MILJOENE INGEPLOEG
Kopers en makelaars het ná die verbod voortgegaan om die Suid-Afrikaanse mark aan die gang te hou. Kopers het sedertdien ongeveer R500 miljoen se wol vir die Chinese mark aangekoop waarvoor hulle nog nie betaal is nie, en waarop hulle maandeliks rente moet betaal. Makelaars het opbergruimte gratis aangebied, wat verdere finansiële druk op hulle plaas.
“Baie kopers het reeds hul limiet bereik van wat hulle kan doen en sal net kan aankoop wat hulle buite China kan verkoop,” sê mnr. Clarence Friskin, van die wolkoper Segard Masurel en voorsitter van die Suid-Afrikaanse wol-en-bokhaarkopers vereniging.
“As die verbod nie gou opgehef word nie, kan dit ernstige finansiële gevolge hê, met sommige maatskappy wat nie sal kan voortgaan nie.”
Die wol wat in die komende seisoen verkoop sal word, is hoofsaaklik langerlengtewol van goeie styl en goeie
skoonopbrengs.
Volgens OVK het die makelaars onder mekaar besluit om die hoeveelheid op die veilings tot 7 000 bale wol te beperk. Die bale op elke veiling sal volgens meriete oorweeg word.
Boere kan dus verwag dat baie wol nie in die komende maande op die veilings sal verkoop nie, veral die tipes wat normaalweg vir die Chinese mark bestem is. China koop ongeveer 80% van Suid-Afrika se wol aan, van die beste style tot die heel swakste.
EUROPESE MARK
“Aan die ander kant het Europa meestal beter style gekoop, sowat 10% tot 20%. Hoewel Europese kopers meer van ons wol kan koop, kan Europa nie die Chinese mark vervang nie.”
Pryse vir die komende seisoen sal onder druk wees, met die Australiese mark wat in die afgelope twee maande aansienlik gedaal het. Dit beteken dat die Suid-Afrikaanse mark onder druk sal wees.
“Ons huidige situasie laat ons met min onderhandelings krag. Ons kan waarskynlik pryse verwag wat minstens 5% laer as die Australiese pryse is.”
OVK waarsku ook dat makelaars tans onder aansienlike druk verkeer weens die groot hoeveelheid onverkoopte wol.
“As die Chinese verbod in die volgende paar weke opgehef word (waarvan daar in dié stadium geen aanduiding is nie), sal ons ’n bottelnek van opgegaarde wol hê wat gaan meeding met die wol wat tans op die mark kom.”
Daar sal dus groot druk op die stelsel wees, wat beteken verdere beperkinge kan tot minstens einde vanjaar op die aantal bale wol per veiling geplaas word.
’n Groot hoeveelheid wol sal dus waarskynlik oorgedra word na volgende jaar en totdat die agterstand uitgewis is.