Lewensversekering: Stel begunstigdes verantwoordelik aan

Dit is belangrik om likiditeitsbeplanning te doen en dan ’n begunstigde op jou lewensversekeringspolis te benoem. Dit is ’n aangeleentheid wat deeglike oorweging verg.

In baie boedels verteenwoordig die waarde van lewensversekering ’n baie groot deel van die kapitaal wat in die finansiële behoeftes van nagelate familie moet voorsien. Die besluit oor wie as begunstigde van hierdie geld aangestel behoort te word, is iets wat nie in afsondering geneem behoort te word nie.

Faktore wat in aanmerking geneem behoort te word, is eerstens die behoefte aan likiditeit in die bestorwe boedel.

Kontant of naby-kontantoplossings is nodig om te verseker dat die eksekuteur, in die afhandeling van sy pligte rondom die administrasie van die bestorwe boedel, genoeg kontant het om uitgawes te delg sonder om ander bates te verkoop of te gelde te maak. Uitgawes behels onder meer uitstaande skuld en rekeninge, kontantbemakings, administrasiekoste en finale inkomstebelasting, wat kapitaalwinsbelasting insluit.

Die quantum van moontlike kapitaalwinsbelasting word dikwels deur kliënte onderskat.

Waar skuld gewoonlik minder word soos ’n mens ouer word, word kapitaalwinsbelasting wat betaalbaar is vanweë die belastingbetaler se afsterwe, gewoonlik meer omdat dit bereken word op die dikwels stygende waarde van bates by afsterwe. Dink byvoorbeeld aan die huis waarin jy bly of plaas waarop jy boer. Appresiasie van die waarde beteken dat daar ’n aaneenlopende verhoging van hierdie koste is.

Die vermoë van ’n begunstige om finansieel verantwoordelike en ingeligte besluite ten opsigte van die aanwending en besteding van hierdie som lewensdekking te neem, is van deurslaggewende belang.

ONDEURDAGTE VERKWISTING

Te dikwels word gesien hoe die dekking wat deur lewenspolisse uitbetaal is, onkundig en ondeurdag verkwis word. Dit is in skerp teenstelling met die oorspronklike bedoeling van die versekering: om kapitaal te verskaf om ’n verlore inkomste te vervang.

Dit is soms skrikwekkend om te sien wat die effek van tyd en inflasie op die koopkrag van geld is, veral as daar vir ’n redelike lang tydperk na iemand se inkomstebehoeftes omgesien moet word. Hierdie beplanning ontbreek dikwels wanneer so ’n groot som geld beskikbaar raak.

’n Moontlike oplossing of verskansingstrategie kan wees om die uitbetaling te verdeel tussen ’n langslewende gade en afhanklike kinders of selfs beter, die uitbetaling deur jou boedel na ’n testamentêre trust te maak. Sodoende kan ’n paneel mense van jou keuse (die trustees) kollektief besluit, aan die hand van hul huidige en toekomstige behoeftes, oor sinvolle aanwending van hierdie geld tot voordeel van jou geliefdes.

Die keuse van trustees asook verdere bepalings rondom hierdie trust behoort deeglik onderwaaronder soek en oorweeg te word en duidelik in jou testament ingeskryf te wees. Ongelukkig is die werklikheid ook dat vertragings in die afhandeling van die boedel soms buite beheer kan wees. Ons ondervind dat belastingbetalers nie altyd op datum is met die indiening van hul persoonlike en besigheidsbelastingopgawes nie. Met die afhandeling van ’n sake-eienaar se boedel moet ’n waardebepaling van die oorledene se belang in ’n onderneming gedoen word.

Indien finansiële state agterstallig is, kan dit lei tot onnodige vertragings om state by te werk om ’n gevolglike waardasie van die besigheid te kan doen. Weereens is hier moontlike kapitaalwinsbelastinggevolge wat vooraf behoorlik gekwantifiseer behoort te word. Agterstallige belasting moet natuurlik eers op datum gebring word voor die besigheid kan vererf of die finale inkomstebelastingopgawe vir die oorlede ingedien kan word.

VERDERE VERTRAGINGS

’n Ander moontlike faktor wat kan bydra tot vertragings in die uitbetaling van lewensversekering en afhandeling van ’n bestorwe boedel, is sterfte as gevolg van onnatuurlike oorsake of redes. Daar is omstandighede ’n sterftesertifikaat nie onmiddellik uitgereik kan word nie, byvoorbeeld wanneer ’n persoon vermis raak of die liggaam nie gevind kan word nie.

Dan is daar natuurlik ook gevalle waar ’n polisondersoek na die oorsaak van dood weens onnatuurlike oorsake eers afgehandel moet word om te verseker dat ’n erfgenaam wat ’n aandeel in die oorledene se afsterwe gehad het, as erfgenaam gediskwalifiseer word. Ten einde ’n doodseis te oorweeg, benodig alle versekeraars in die eerste plek voldoende bewys van afsterwe en, vir die redes hierbo genoem, word sterk oorweging geskenk aan die oorsaak van dood. Die beginsel van De Bloedige Hand Erft Niet sal gevolglik ’n persoon wat ’n aandeel in die afsterwe van die betrokke versekerde lewe gehad het, as erfgenaam diskwalifiseer.

Dit is baie belangrik om die aanstelling van ’n begunstigde of begunstigdes as bevoordeeldes op lewensversekering met omsigtigheid te benader ná behoorlike likiditeits- en finansiële beplanning gedoen is. Hierdie besluite moet in die konteks van ’n totale boedel, en nie in afsondering nie, geneem word. Om te verseker dat die aanstelling van begunstigdes strook met die algehele beplanningsdoelwitte word lesers aangeraai om hul boedelbeplanning minstens een keer per jaar deur ’n behoorlik gekwalifiseerde persoon te laat hersien.

25 Augustus 2022