INTERNASIONALE LANDBOUNUUS
1 AUSTRALIË Hawens kan nie voorbly met koringuitvoer
Logistieke maatskappye raak op kreatiewe maniere betrokke by koringvervoer in Australië weens bottelnekke by groot koringuitvoerterminale. Dit word veroorsaak deur groot buitelandse vraag vanweë die oorlog in Oekraïne. Een manier waarop vervoermaatskappye inspring, is om ligter vaartuie te gebruik om vragte uit vlakker hawens te vervoer na groot vragskepe wat in dieper waters vasmeer. Vragmotors omseil ook oorlaaide laaigeriewe in hawens om koring op skepe te laai. Die aandeel van kleiner maatskappye in grootmaat-graanuitvoer het gegroei tot 18% in die huidige seisoen, van net 2% drie jaar gelede. — Bloomberg
2 AMERIKA | Beyond Meat boer agteruit
Beyond Meat, die genoteerde vervaardiger van plantgebaseerde “vleis”, het ’n netto verlies van $97,1 miljoen (R1,6 miljard) aangeteken. Die maatskappy se netto-inkomste was ook 1,6% laer as ’n jaar tevore. Hy het ook aangekondig dat hy sowat 4% van sy werksmag, oftewel 40 werkers, gaan aflê. Mnr. Ethan Brown, uitvoerende hoof, het gesê weens hoë inflasie is minder verbruikers geneë om Beyond Meat se produkte, wat in ’n premieprysklas val, te koop. Hy het gesê dié kwartaal was die eerste in vier jaar wat ’n afname in die groei in verbruik van dié produkte getoon het. Beyond Meat se nagemaakte beesmaalvleis kos sowat $8,35 per pond (R139, of R307/kg) en gewone maalvleis $4,90 (R81,48, of R180/kg). — Food Dive
3 PAKISTAN | Koringtransaksie op ys oor prys
Ondanks ’n voedsel- en skuldkrisis wil Pakistan ’n Russiese aanbod van 120 000 ton koring van die hand wys. Rusland het die koring teen $399,50/ton (R6 643/ton) aangebied, maar Pakistan het aangedring op ’n prys van $390/t (R6 484/t), wat die land $1,4 miljoen (R23 miljoen) sou bespaar. ’n Kabinetskomitee het besluit indien Rusland nie teen die laer prys wil verkoop nie, sal hy die transaksie kanselleer omdat koringpryse begin daal het ná Oekraïnse graanskepe weer graan kon begin uitvoer via die Swartsee. Pakistan wil vanjaar 3 miljoen ton koring invoer ter wille van verbruiksbehoeftes en strategiese reserwes, en het reeds 986 000 ton bekom. — The Tribune Express/ANI