BIOSEKERHEIDSPLAN
Dr. Stuart Varrie waarsku dat wolboere nie van die uitbreking van bek-enklouseer kwytgeskeld is nie en steeds die nodige biosekerheidsmaatreëls gereed moet hê om verspreiding na hul plaas te voorkom.
Op ’n onlangse paneelbespreking op Agri Oos-Kaap se kongres oor die uitbreking van bek-en-klouseer het dr. Shaun Morris, ’n veearts wat konsultasiedienste aan voerkrale bied, boere gewaarsku dat die virus oornag deur die onwettige of ongereguleerde beweging van diere in ’n sleepwaentjie uit Limpopo na die Wes-Kaap versprei kan word.
“Boere moet besef dat daar tans ’n uitgebreide uitbreking van bek-enklouseer in die land is wat nie onder beheer is nie,” sê Varrie.
Boere moet bewus wees van biosekerheid op die plaas, wanneer diere na die plaas gebring word wat moontlik die virus kan versprei.
Boere moet onder meer op die volgende let:
■ Waar die diere gekoop word en vandaan kom.
■ Die dier moet deur die regte verkopersverklarings vergesel word, waar die dier se gesondheidstatus deur verkieslik ’n veearts gesertifiseer word.
■ Diere wat van buite na die plaas gebring word moet vir 28 dae afgesonder word, waar die diere geen direkte kontak met ander diere het nie. Varrie stel voor dat die veearts dan weer die diere inspekteer om die gesondheidstatus te bevestig voor die diere op die plaas vrygelaat word.
■ Alle werkers, voertuie of sleepwaens wat kontak met die diere gehad het, moet ontsmet word voor hulle/dit verder na die plaas beweeg.
■ Bek-en-klouseer versprei deur regstreekse kontak tussen diere en ook deur aanraking met voorwerpe soos klere, skoene, hande, voertuie en sleepwaens.
■ Boere moet bewus wees van mense wat tussen plase beweeg, soos skeerders, maatskappyverteenwoordigers en veeartse.
Varrie maan boere om alles in hul vermoë te doen om die verspreiding van die siekte te keer.
“Die enkel grootste bedreiging vir die verspreiding van die siekte oor die land is die onreëlmatige beweging van diere.
Volg dié skakel na die nasionale dieregesondheidsforum se basiese biosekerheidsmaatreëls: nahf.co.za/ the-basic-biosecurity-guidelines-forfoot-and-mouth/