Blink toekoms voorsien vir pekanneute
Hoë opbrengste, goeie gehalte, gunstige internasionale marktoestande en ’n swak wisselkoers is alles faktore wat kan bydra tot ’n uitstekende Suid-Afrikaanse pekanneutoes vanjaar.
Die meeste pekanneutboere reg oor Suid-Afrika ervaar tans die hoogste opbrengs in hul produksieleeftyd vir die oesjaar van 2022. Dit word gekenmerk deur ’n kombinasie van wat kenners beskryf as ’n “aan”jaar in die dra van pekanneute aan ’n boom, en die toevoeging van nuwe aanplantings wat jaarliks in produksie kom.
Hoewel Suid-Afrika van 2015 tot 2021 slegs 4% tot 6% van die internasionale pekanneutoes gelewer het, speel die land se relatief klein oes ’n groot rol in die internasionale mark van pekanneute wat in die dop bemark word.
Die Suid-Afrikaanse oes het sedert 2012 vanaf ’n basis van 7 900 ton gemiddeld met 15% per jaar gegroei. Kenners skat dat 2022 se oes 27 000 ton sal beloop. Met die groot hoeveelheid nuwe aanplantings wat in die volgende jare in produksie gaan kom, is daar vooruitskattings dat die plaaslike pekanneutoes selfs reeds in 2025 tot 40 000 ton kan styg.
Hoewel die rand in April vanjaar tot sowat R15,55 teenoor die dollar versterk het, was daar goeie verskansingsgeleenthede tot vlakke rondom R17/$ vir netto uitvoerders van produkte. Die keersy van die redenasie is dat ’n swak rand weer nadelig is vir die invoer van produksiemiddele wat nodig is vir die produksie, verwerking en verkoop van pekanneute.
Weens verskeie faktore was die opbrengs en gehalte van markleiers, soos Amerika en Mexiko, kleiner en swakker as verwag. Dit beteken dat die Suid-Afrikaanse oes hierdie jaar ’n groter impak op die internasionale mark kan maak.
Die gehalte en tydsberekening van die plaaslike oes, gepaardgaande met gunstige handelsooreenkomste tussen Suid-Afrika en China, is van die hooffaktore waarom sowat 90% van die Suid-Afrikaanse oes in die dop na China uitgevoer kan word.
Hoewel die Suid-Afrikaanse pekanneutbedryf alternatiewe markte vir toekomstige besigheid soek, dui alle tekens daarop dat Chinese kopers die hele Suid-Afrikaanse oes van 2022 gaan koop. Tans word ’n baie klein deel van die Suid-Afrikaanse oes by verwerkingsaanlegte deur ’n kraakproses geplaas. Die meeste van die uitset van die kraakproses word in die plaaslike versnaperingsmark verbruik, en indien internasionale geleenthede opduik, sal daarvan uitgevoer word.
Korttermynbesluite moet egter geneem word met die doel om die beste prys vir die produsent te waarborg. Sonder hierdie sleutel in die waardeketting sal die Suid-Afrikaanse pekanneutbedryf nie kan voortbestaan nie. Die strategiese klem moet egter op lang termyn wees om die produk na verskeie uitvoermarkte reg oor die wêreld te versprei om só die risiko’s te diversifiseer.
Bester Fruit & Nuts bestuur die verkryging, verwerking en bemarking van pekanneute.
Hierdie drie funksies word geïnkorporeer in ’n handelsoplossing wat herhaaldelik hersien word om die verhouding tussen produsente en die internasionale verbruikersmark te versterk.
Deel van Bester Fruit & Nuts se kernwaardes is om sy kliënte en verskaffers so goed moontlik te dien, en aanpasbaar te wees vir onvoorsiene gebeure.
Die onsekerheid oor die toekoms van die Suid-Afrikaanse pekanneutbedryf laat baie belanghebbendes huiwer, maar met die toepassing van jare se produk- en markkennis, die gebruik van tegnologie, integriteit en ’n optimistiese ingesteldheid voorsien Bester Fruit & Nuts ’n blink, opwindende toekoms vir die jong bedryf.
Bester Fruit & Nuts bestuur die verkryging, verwerking en bemarking van pekanneute.