Makliker, vinniger marktoegang
Die veebedryf staan aan die vooraand van ’n groot omwenteling danksy ’n unieke samewerkingsooreenkoms tussen die Red Meat Industry Services, Cape Wools, die Karoolam-konsortium en Landbouweekblad.
Die Suid-Afrikaanse veebedryf het twee groot suksesse die afgelope paar jaar beleef.
Eerstens was daar die verstommende groei in rooivleisuitvoer wat plaaslike vleispryse gestu het tydens die ontwrigting van ’n bek-en-klouseer-uitbreking.
Die wolbedryf het ook verskeie sertifiseringskemas aanvaar, wat Suid-Afrika deesdae die grootste uitvoerder van volhoubaar geproduseerde wol in die wêreld maak.
Sentraal tot albei dié prestasies is ’n naspeurbaarheidstelsel en onafhanklike sertifiseringsproses wat verseker dat boere wel lewer wat hulle beloof. Daardie twee sleutelprosesse gaan binnekort ’n groot hupstoot gegee word deur ’n samewerkingsooreenkoms tussen die Read Meat Industry Services, Cape Wools, die Karoolam-konsortium, Landbouweekblad en hul tegnologievennote.
Johann, jy staan aan die hoof van die Karoolam-konsortium, wat naspeurbaarheid én sertifisering verlang.
Hoekom is die twee konsepte so belangrik vir die veewaardeketting?
In wol, bokhaar, vleis en velle (leer) is daar deesdae, net soos in die uitvoervrugtebedryf, ’n magdom private standaarde wat deur vervaardigers en kleinhandelaars gebruik word om hul produk aan die verbruiker voor te lê.
Die verbruiker in ons vernaamste uitvoermarkte wil weet waar sy voedsel en vesel vandaan kom en dat sy koolstofspoor laag is, dat dit in ’n volhoubare omgewing geproduseer word en dat goeie arbeidspraktyke en dierewelstand gehandhaaf word.
Vir die toekoms van die kleinveebedyf is dit dus noodsaaklik om hierdie waardes via naspeurbaarheid en goeie bestuur van die waardeketting te verseker.
Waar lê die waarde vir die boer in die proses?
Vir die boer beteken dit toegang tot die modehuise in Frankryk, Italië en Engeland en vir ons topvoedselkleinhandelaars ’n waarborg van goeie inkomste en natuurlik ’n vol
gehoue vraag na hul produkte.
Maar dan moet die boer met trots en eerlikheid deel wees van die naspeurbaarheidsproses.
Wat wil julle bereik met die saamtrek op 20 April op Victoria-Wes?
Die saamtrek is ’n meganisme waardeur die wol- en vleisbedryf aan boere in die Karoo ’n nuwe stel waardes, tegnologie en prosesse wil voorlê wat vir hulle die pad kan oopmaak om met minimale moeite te voldoen aan die talle bestaande standaarde, oudits en sertifiseringprosesse.
Al die vername markte wil weet hul produkte kom uit die Karoo en is volhoubaar geproduseer met goeie boerderypraktyke. Cape Wools, RMIS en Karoolam-konsortium wil tydens die saamtrek ’n nuwe, eenvoudige naspeurbaarheidstegnologie bekend stel aan boere en verduidelik hoe dit toegepas sal word.
Hoe kan tegnologie die prosesse van naspeurbaarheid en sertifisering meer vaartbelyn maak?
Die tegnologie werk amper soos Facebook of Instagram, waar jou data oor jou plaas, jou praktyke en jou diere alles joune bly en jy kan kies met watter “vriende” jy dit wil deel. Jy kan dus ’n sertifikaat vir RWS hê, maar ook graag – benewens wol – Karoo-lam aan ’n boetiekslaghuis wil bemark. Die feit dat die plaas in die Karoo is en reeds RWS-akkreditasie het, beteken dat jy outomaties in aanmerking kom om Karoolam amptelik te lewer.
Wie sal die boer se data besit?
Net soos Facebook besluit jy watter data jy wil deel en aan wie jy toestemming gee om jou plaas se data te sien. Dit is jou data!
Wat beteken Cape Wools en Red Meat Industry Services se betrokkenheid by hierdie saamtrek?
Dit kom al ’n lang pad en met die biosekerheidskrisis in die veebedryf is daar besef dat partye moet saamwerk. Gesprekke tussen Cape Wools, RMIS en Karoolam-konsortium het aangetoon dat almal se behoeftes dieselfde is en dat ’n gesamentlike naspeurbaarheidstelsel vir alle partye, boere en ander belanghebbendes in die verskillende waardekettings van groot waarde sal wees en eindelik aansienlike koste vir die boer, abattoir en kleinhandelaar kan bespaar.
* Die saamtrek vind plaas op 20 April van 09:00 tot 13:00 in die Apollo-teater. Koste is R120 en sluit middagete in.