Taai stroper deins nie terug vir harde werk
John Deere AME is opgewonde om sy S440stroper vir die Afrika- en Midde-Oosterse mark vanjaar op die Nampo-oesdag bekend te stel.
Die S440 is ’n klas 4-stroper, maar dit het al die kenmerke en tegnologie van die groter klas S-stroperreeks. Die S440 beskik dus oor al die verlangde vereistes vir doeltreffendheid, betroubaarheid, graanmonstergehalte en oestegnologie, sê Jacques van den Berg van John Deere.
“Hierdie stroperreeks is ’n uitstekende keuse vir die kleiner of middelgrootte boer wat op soek is na ’n tegnologies gevorderde stroper om sy boerderybedrywighede te verbeter.”
Kenmerke
Die S440 se raamgrootte en enjinkapasiteit is kleiner in vergelyking met sy groter eweknieë, maar dit het steeds groot trefkrag. Die stroper is toegerus met die bewese 6,8 liter-John Deere Vlak-3-sessilinder-enjin wat oor ’n isochroon-reguleerder beskik wat selfs tydens spitskragaanvraag rotasie handhaaf. Met gegradeerde 175 kW-krag en 191 kW-spitskrag handhaaf dit doeltreffende materiaalverwerking gedurende die hele oesbewerking om groter werkverrigting te behaal.
Dors, skei en skoonmaak
Die S440 is ’n rotorstroper wat opgestel kan word om ’n verskeidenheid grane doeltreffend te kan oes – van mielies en sojabone tot koring, kanola, rys, sorghum en meer. Die John Deereontwerpte Tri-Stream-rotor van 61 cm x 313 cm sorg vir die doeltreffende dors en skeiding van graan, terwyl brandstof en kragverbruik verminder word. Dit word gekoppel aan die Dyna Flow Plus-skoonmaakstelsel wat kant-deflektors insluit om eweredige verspreiding van materiaal oor die hele lengte van die siwwe te verseker.
“Die outomatiese grondverstellingskontroles, Active Terrain Adjust™, beperk graanverlies tot die minimum wanneer teen skuinstes en hellings gestroop word. Dit word bereik deur die outomatiese aanpassing van die waaierspoed in samewerking met die outomatiese verstelling van die siwwe, na gelang van die hoek waarteen die stroper stoop,” sê Van den Berg.
Tegnologie
Alle standaard-, asook ’n paar gevorderde stroperfunksies is by die basisspesifikasie ingesluit. ’n Veelsydige hoekpaal-vertoonskerm, ’n laterale kanteltoevoerhuls, Active Terrain Adjust™ vir oes teen skuinstes of hellings, vog- en opbrengssensors, verstellings vanuit die kajuit van alle instellings (rotor- en waaiersnelhede, konkaaf-speling, kapmes, sif, kophoogtebeheer, uitskot) en ’n toonaangewende JD Link Connectivity™-intekening is alles met die standaardpakket beskikbaar.
Boere het ook die opsie om bykomende gevorderde tegnologie-oplossings direk in die fabriek op hul werktuig te laat installeer. Dit sluit in die Starfire™ 7000-GPS-ontvanger en ’n Gen 4-raakskerm wat Auto-Track™en Row-Sense™-funksies het. Hierdie opsies maak veilige, koordlose oordrag van oesdata en opbrengskaarte moontlik, direk na die boer se selfoon en na die wolkgebaseerde John Deere Operations Centre™-presisieboerdery-oplossing. Voorts sal die 24/7-afstandskermtoegang en -diensadviseurvermoëns klante ’n ekstra voorsprong en groter gemoedsrus gee.
Spesifikasies
Die kragtige 6,8 liter-enjin word gekombineer met ’n hidrostatiese driespoedratkas en ’n 65 kW-invoerkanaal-aandrywing. Die S440 het ’n graantenk van 6 500 liter en ’n 5,5 m-aflaai-awegaar wat teen ’n tempo van 65 liter per sekonde kan aflaai. Aflaai kan tydens stroop geskied. Vir die verwerking van materiaal kan boere kies tussen ’n standaardof ’n gevorderde dubbelspoed-afvoer-kapstamper met dubbele strooierskywe.
Gerieflike kajuit
’n Luukse kajuit met oorgenoeg ruimte sal produktiewe en gemaklike ure agter die stuurwiel verseker. Dit behels onder meer ’n lugkussing-hangstoel vir die bestuurder, kantelbare stuurkolom, lugversorging, ’n mini-verkoeler, radio en sonskerms, en ’n instrukteursitplek.