Ná 100 jaar steeds aan die voorpunt
AFGRI se bestaan van 100 jaar getuig daarvan dat dié maatskappy die landbousektor verstaan en weet wat dit verg om volhoubaar te wees. Met die oog op nóg ’n suksesvolle eeu gaan AFGRI nie sy pas van vernuwing verslap nie.
Op 5 April vanjaar vier AFGRI sy 100ste bestaansjaar. Wanneer hierdie landboumaatskappy terugkyk op al die verhoudings wat hy deur die jare gebou het, is dit duidelik hy is trots om die landbousektor te dien. Om ná ’n eeu steeds suksesvol te wees, verg deursettingsvermoë, passie en visie.
AFGRI is geseën met leiers wat vernuwing aangryp, die pas aangee vir tegnologiese ontwikkeling en ’n legio personeellede wat die boeregemeenskap bystaan.
As landbouvennoot is AFGRI trots om deel te wees van talle suksesstories wat Suid-Afrika ’n wêreldleier in kosproduksie maak. Vanjaar kyk AFGRI terug op 100 jaar en die mylpale wat elke dekade gebring het.
Die eerste 50 jaar van AFGRI se bestaan het baie verandering gebring in hoe boere hul ondernemings bestuur en hoe AFGRI hulle bystaan.
Wie sou kon dink dat 150 boere wat in 1923 bymekaar gekom het om die Oos-Transvaalse Landboukoöperasie (OTK) te stig, die landbousektor só sou verander? Dit was die begin van ’n reuse-landbouonderneming met vele vertakkings wat vandag bekend staan as AFGRI.
Destyds het OTK vinnig gegroei deur opberging en tegniese dienste aan boere in Mpumalanga te bied.
Die eerste 50 jaar ná die stigting is gekenmerk deur deurlopende uitbreiding van silokapasiteit, sodat AFGRI vandag oor die kapasiteit van byna 5 miljoen ton beskik.
In 1963 het die koöperasie ’n ooreenkoms met John Deere gesluit vir die verspreiding van sy toerusting in Afrika. Dus vier AFGRI Meganisasie ook sy 60 jaar lange vennootskap met John Deere.
Al die uitbreidings het een doel gehad: volhoubare groei vir die landbou en om te kyk hoe AFGRI boere kan dien as ’n toonaangewende maatskappy in die landboubedryf.
“Die kern van ons sukses is die waarde van die verhoudings wat ons bou. AFGRI verstaan die struikelblokke in boerdery en probeer om deur die ondersteuning van boeredae ’n platform te skep waar boere toerusting kan toets, tegnologie eerstehands kan ervaar en bande met ons landbouvennote kan smee,” sê Norman Celliers, uitvoerende hoof van die AFGRI-groep.
“Vanjaar sien ons daarna uit om ons eeufees te vier op Nampo, die Swartlandskou, Nampo Kaap, die Val-boeredag en die Balfour-hooidag.
“Met elke geleentheid hoor ons stories van sukses en oorwinning ten spyte van moeilike omstandighede.
“Só weet ons dat die landbou altyd ’n sukses sal wees danksy Suid-Afrika se boere. Soos ons boere altyd ’n plan maak, sal AFGRI altyd daar wees om hulle by te staan.”
Om na die toekoms te kyk en besluite te neem wat voedselsekerheid en boere se voortbestaan raak, vereis visie en kennis van ingewikkelde stelsels, neigings en toekomstige eise.
“Spanwerk, talent en die wete dat môre beter kán wees as vandag – dit is hoe AFGRI vandag sy plek vol staan as wêreldklas-verskaffer van landboudienste,” sê Jacob de Villiers, bedryfshoof van AFGRI.