Grootste Bonsmara-kudde blink uit
Vir die tweede agtereenvolgende jaar lewer dié kudde van 42 000 diere Paraguay se Bonsmara-eliteplatinumkoei op. Dit span die kroon op 23 jaar se intensiewe seleksie vir die beste koeie, wat ’n spogteelkudde van 700 opgebou het.
Die groot afstand tussen Paraguay en Suid-Afrika is nie te ver vir Rubens Forbes Alves de Lima om hom voluit vir die teel van topgehalte Bonsmara-beeste te beywer en sy data met die ras se telersgenootskap aan die suidpunt van Afrika uit te ruil nie.
Bella Alianza Bonsmara is deel van ’n massiewe beesboerdery by Capitán Bado in die noorde van Paraguay. Daar boer die 76-jarige Rubens met 16 000 koeie wat deur kunsmatige inseminasie bevrug en deur 250 SP-bulle gedek word. Sy hele beesboerdery bestaan uit 42 000 diere waarvan 80% jaarliks in sy voerkrale afgerond en geslag word.
Ruim 70% van die slagbeeste het minstens 50% Bonsmara-gene.
Dit is waarskynlik die grootste kommersiële Bonsmara-projek ter wêreld.
Driemanskap
Die stoetery het vanjaar se Bonsmara-eliteplatinumkoei vir dié Suid-Amerikaanse land opgelewer. SA Stamboek kies elke jaar een koei per ras (in die geval van die Bonsmara ook Elitekoeie in Namibië en Paraguay) vanuit die Logix-databasis om tydens sy galageleentheid op 1 Mei in Bloemfontein vereer te word. Die koeie word volgens uitsonderlike produksie, reproduksie en genetiese merietestandaarde aangewys.
Die stoetery word bestuur deur Rubens (eienaar), dr. Gabriel Pelissari de Rodrigues (hoofbestuurder en veearts) en dr. José Roberto Puoli, herkouervoedingkundige.
Intensiewe teling
Rubens het eers met Nelore-beeste in Brasilië geboer. In 1999 het hy Bonsmaras aangekoop en die stoetery na Paraguay verskuif. Ná 23 jaar van intensiewe teling het hy nou 700 teelkoeie en verkoop 150 SP-bulle per jaar. Data oor die beeste word na SA Stamboek gestuur waar die beraamde teelwaardes saamgestel word.
Hy het die Elitekoei BBA 13-0084 self geteel. Sy is op 7 Maart 2013 gebore en was 31,5 maande oud toe sy self die eerste keer gekalf het. Sy het reeds agt kalwers gespeen, waarvan sewe geregistreer is, en is weer dragtig. Verlede jaar het die stoetery ook ’n Elitekoei, BBA 11-0159, opgelewer.
Hy vertel die Bonsmara is in 1994 deur Brasilië as nie-seboeras gekies om met ’n plaaslike ras gekruis te word omdat hierdie Suid-Afrikaans geteelde ras in die trope aangepas is. Argentinië het ook Bonsmaraembrio’s van Suid-Afrika ingevoer. Brasiliaanse boere kon van daardie bulle se saad aanskaf. Later het ’n protokol met Suid-Afrika die boere in staat gestel om teelmateriaal van Suid-Afrika in te voer. Hulle het oor jare sowat 20 000 embrio’s ingevoer.
Rubens en José is van plan om hul eerbewys self te ontvang.
“Ons is baie tevrede met die resultate wat ons met die Bonsmara en die gehalte van Bonsmara-vleis behaal.”