Eenvoud en wins dra gewig
Hou ’n boerdery so eenvoudig moontlik en selekteer deurgaans vir vrugbaarheid. Die eienaar van die Romagnola-elitekoei pas hierdie eenvoudige – maar beproefde – bestuursresep in sy stoetery én voervloeiprogram toe.
As ’n beesboer keer op keer die Elitekoei vir drie beesrasse oplewer, moet iets in sy seleksie- en bestuursprogram vir ander telers waardevol kan wees.
Dail van Rensburg van Delareyville het eenvoudige raad vir sy medeboere: Moenie jou bestuursprogram met te veel fieterjasies vul nie, maar moet ook nie van vrugbaarheid vergeet nie.
Hy boer sedert 1983 op die plaas Kalkpan by Delareyville en besit ook plase in aangrensende distrikte. Vanjaar het hy vir die soveelste keer die Elitekoei vir die Romagnola opgelewer. Die Santa Gertrudis-elitekoei vir 2023 behoort ook aan hom en het hy ook al die Ankole-elitekoei opgelewer. Sy stoetdiere word onder die naam Rensbou bemark.
Danksy Dail se streng seleksie vir vrugbaarheid het talle koeie in sy kuddes ’n puik tussenkalfperiode. DT 12-0072, die Romagnola-elitekoei vir 2023, getuig van die waardes wat vir hom so belangrik is. Sy vertoon vroulikheid en het ’n goeie toplyn en goeie balans – ’n goeie voorbeeld van die moderne Romagnola-koei.
Buiten tydens ’n ernstige droogte word koeie wat nie elke jaar kalf nie, uitgeskot.
“Ek slag selfs stoetkalwers as hulle nie aan die vereistes vir vrugbaarheid en groei voldoen nie.”
Gebruik topbulle
Hy gebruik slegs teelbulle waarvan die semen minstens 75% normale sperms bevat, maar verkieslik 90%, en wie se moeders ’n goeie TKP het. Dail bestudeer beskikbare topbulle op die internet en voer dan semen uit Italië en Australië in om genetiese variasie te handhaaf.
Hy het twee kalftye – vanaf Augustus en vanaf Maart.
In groter troppe gebruik hy meer as een bul en doen DNS-ontledings van die beste kalwers om hul vaderskap te bepaal. In kleiner troppe pas hy enkelbulparings toe.
Sy vernaamste bulmark is kommersiële beesboere wat kruisteling ter wille van basterkrag doen.
Goeie voervloeiprogram
Dail se uitgangspunt van eenvoud en wins word ook op sy voervloeibestuur toegepas. “Ek bestuur my weiveld op die hoogste vlak om te verseker die beeste produseer optimaal. Hulle word op natuurlike veld en aangeplante weiding aangehou, maar party kuddes wei slegs op die veld.”
Sy beeste kry somer- en winterlekke om optimale voeding en gesondheid te verseker. Die beweidingstydperk van die veldkampe (soetveld bestaande uit hoofsaaklik vinger-, borseltjie-, swartvoetjie- en sandkweekgras) is so kort moontlik (twee tot drie weke) en dan rus die kamp so lank moontlik (tien tot twaalf maande).
Die boerdery het ook aangeplante weiding (bloubuffel- en smutsvingergras) wat elke twee jaar bemes word teen ongeveer 150 kg KAN/ha. Hierdie weiding word meer gereeld bewei na gelang van die beskikbare plantmateriaal.