Nóg ’n wenner uit vrugbare kudde
Vlotvlei-Senepols se tweede Elite-toekenning vir dié ras bevestig aan die deurwinterde Theuns Vlotman dat sy teelbenadering die teiken tref.
Die prestasie van die topkoei uit die Vlotvlei-kudde is nou gekoppel aan haar aanpasbaarheid. “Daarsonder sou sy nie dié goeie indekssyfers kon behaal nie. Sy is ook die toonbeeld van vroulikheid en die soort dier waarna ons streef.” Theuns Vlotman is baie trots op sy “tipiese Senepol” wat haarself in die trop onder normale omstandighede bewys het.
VL 13-0026 is die nageslag van die stoetvaar, VL 10-0001, die stoetery se eerste bul wat hy op ’n veiling aangebied het. Hy vertel die opwinding om sy eerste bul teen R80 000 op die genootskap se nasionale veiling te verkoop, kan vergelyk word met die twee Elitekoeie op sy kerfstok. Verskeie van dié bul se dogters is steeds produktief in die kudde.
Die Elitekoei was 26 maande oud met die geboorte van haar eerste kalf, waarna sy jaarliks gekalf het. Die bekroonde koei is deel van sy kudde se opteelprogram vanuit die rooi Angus en is as aanhangsel B met ’n rasegtheid van 75% by SA Stamboek aangeteken. Hy ondervind nog soms probleme met die harige bedekking van die Angus-voorgeslagte, maar diere wat nie aan die gladde haarkleed van die Senepol vir insekweerstandigheid voldoen nie, word uitgeskot.
Identifiseer vroegryp diere
Dit strook met die benadering om verse op 15 maande te laat dek. Indien hulle dan nie dragtig raak nie, kry hulle ’n tweede kans om die daaropvolgende jaar te kalf. Verse wat nie voor die ouderdom van 39 maande kalf nie, word uitgeskot. “Só identifiseer ons vrugbare, vroegryp vroulike diere.”
Theuns het sowat 17 jaar gelede met die ras begin boer, maar sedert sy aftrede uit die onderwys wy hy ál sy aandag aan die beeste.
Weidingsbenadering
Die teeltrop van 100 koeie en verstrop van sowat 60 word op die plaas se rant- en vlakteveld, spruite en vleie aangehou. Die grasbedekking is 90% soetgras, met rooigras (Themeda triandra) as die dominante bedekking. Theuns sê die grassamestelling is baie smaaklik en hy laat dit oordeelkundig bewei.
Hy gebruik ’n aanpasbare beweidingstelsel wat hoëdrukbeweiding insluit waar dit prakties moontlik is, met die doel om meer diere per hektaar aan te hou. En hy probeer om minstens een derde van die beskikbare weiding ’n volle groeiseisoen te laat rus.
“Ons lekprogram vir die koeikuddes behels ’n fosfaatlek vir die somer en ’n ureumgebaseerde proteïenlek vir die winter.”
Vlotvlei-Senepols is deel van die Grasveld-groep van drie telers wat daarna streef om winsgewend op die Sentraal-Vrystaat se natuurlike weiding te boer.
Die Grasveld-telers verkoop hul bulle jaarliks op die nasionale veiling van die Senepol-beestelersgenootskap, wat vanjaar op 19 Augustus by Circle C, Verkeerdevlei, aangebied word.
Die Senepol-ras word nog in Suid-Afrika gevestig nadat enkele beeste van 2003 tot 2005 ingevoer is, waarna die meeste telers met opteelprogramme begin het. Daar is tans sowat 40 telers landwyd.
Volgens Vlotman word goeie vordering met die teel en gehalte van diere gemaak en die vraag na bulle, veral vir die erfdwang van kruisteling, is hoog.