Stories wat in die landbou saak maak
Zuma-spook herrys
’n Aantal omstrede beleidsbesluite oor grondhervorming wat tydens oudpres. Jacob Zuma se termyn die lig gesien het, maak na verwagting eersdaags hul verskyning in ’n wetsontwerp oor die herverdeling van grond. Volgens Agbiz sal dié wetsontwerp waarskynlik bepalings bevat oor onder meer onteiening, grondplafonne en perke op buitelandse grondbesit. ’n Tweede wetsontwerp, oor verblyfsekerheid op kommunale grond, word ook verwag. Agbiz sê in sy nuusbrief dié wetsontwerpe word tans gefinaliseer en sal waarskynlik in Mei vir openbare kommentaar gepubliseer word. Daarna sal hulle na Nedlac gestuur word. Die plan is om die wetsontwerpe in Augustus of September in die parlement voor te lê.
Stop dié BTW!
BTW moet afgeskaf word op sekere plaaslik geproduseerde hoendersnitte, en dié doelwitte moet ingesluit word in die pluimveemeesterplan. Francois Baird, stigter van die teenstortingsbeweging FairPlay, sê die plan in geheel moet hersien word, “omdat dit tans lyk asof die pluimveebedryf gedwing word om sy verbintenisse na te kom, maar niemand anders nie”. FairPlay reken deur die snitte wat arm en middelklasmense die meeste koop, van BTW kwyt te skeld, kan ’n groter impak gemaak word as om alle hoendervleis BTW-vry te maak, omdat rykes kan kies tussen verskillende proteïenbronne, terwyl “armer mense se keuse lê tussen proteïen of geen proteïen”. Sien ook bit.ly/3K5mn4n en bl. 20.
Waghond pak dié kosse
Appels, sitrus, piesangs, pere, tafeldruiwe, aartappels, uie, wortels, kool, tamaties en spinasie word uitgesonder in die mededingingskommissie se ondersoek na mededinging in die waardeketting vir vars produkte. Hardin Ratshisusu, adjunkkommissaris en voorsitter van die ondersoekpaneel, sê die bedryf se produkreeks is te groot om alles te ondersoek. Dié produkte verteenwoordig minstens 70% van die produksie en verkope van vars produkte. Die ondersoek moet binne 18 maande vanaf 31 Maart voltooi wees. Lees meer by bit.ly/42BM6bX.
Koring kry nog ’n kans
Syngenta gaan oor ’n jaar sy eerste kommersiële hibriede koringsaad in Amerika bekend stel, wat volgens die maatskappy opbrengste met 10-12% kan verhoog. Dié nuus kom kort ná BASF laat blyk het hy gaan ’n soortgelyke projek daar beëindig. Paul Morano, Syngenta se hoof vir grane in Noord-Amerika, het aan Successful Farming gesê daar sal genoeg van dié saad beskikbaar wees vir sowat 400 ha in die 2024-plantseisoen. Syngenta verwag om in 2025 twee kultivars beskikbaar te hê, en dan albei kultivars in 2026 amptelik bekend te stel. Syngenta se projek het in 2010 afgeskop.