Wat mense op Landbou.com lees

In memoriam

Die afsterwe van landboupersoonlikhede kry groot aftrek onder Landbou.com-lesers die afgelope weke. Prof. FJ van der Merwe (91), hoogleraar in veeteelt aan die Universiteit Stellenbosch, is op 3 Maart oorlede. Hy was allerweë bekend as Prof. Frans en het onder meer rigtinggewende studies in die mineraalbehoeftes van plaasdiere en ruvoerbenutting gelei (bit.ly/3FT5Ca6).

Jan van der Wath (76), geliefde Boerperdteler en stigter van die SA Boerperd Telersgenootskap, is op 10 Maart oorlede. Die perde uit sy Lang Carelstoetery by Lüneburg het ’n belangrike bydrae gelewer tot die bloedlyn (bit.ly/40F2PcK).

Die ontydige afsterwe van

Willem de Beer (45), van die suksesvolle en invloedryke Beerseun-boerdery op Ofcalaco naby Tzaneen op 17 Maart, was ’n reuseslag vir dié gemeenskap (bit.ly/3ZjRz4b).

Boere pak misdaad

Boere langs die Vaalrivier by Orkney, Vierfontein en Viljoenskroon ly miljoene rande se skade weens koperdiefstal by hul pompstasies, maar in drie gevalle waar boere diewe op heter daad betrap en gesprekke met die polisie en landdroste gevoer het sodat die diewe aan die kaak gestel kan word, het die saakdossiere verdwyn (bit.ly/3z5pao1).

TLU SA het ’n klag van haatspraak teen Cosatu gelê ná die vakverbond gesê het boere is moordenaars, rassiste en verkragters (bit.ly/3nkrzse).

Gure weer

Die weerstoestande wek altyd groot belangstelling op Landbou.com. Vir een Suid-Afrikaanse boerefamilie in Mosambiek het sikloon Freddy

670 mm reën gebring

(bit.ly/42Ku1Z6 ),en Matjiesfontein in die Karoo het binne 90 minute omtrent 100 mm reën gekry

(bit.ly/40DQqWo). Die vooruitsigte vir reën in die Wes-Kaap, wat regstaan om te plant, het ook groot aandag getrek, asook vooruitsigte van ’n komende El Niño-weerverskynsel (bit.ly/3ZlgPXI).