Koeie lewer meer melk met klassieke musiek, bewys studie
Komponiste soos Mozart, Beethoven en Grieg kan melkboere nou bystaan om hul melkproduksie te verhoog, aldus ’n studie aan die Universiteit van Pretoria (UP).
Die studie het bevind dat strelende klassieke musiek melkkoeie se stresvlakke verlaag en hulle help om meer melk te produseer. Die studie is gedoen deur Lize-Mari Erasmus, ’n voormalige lid van die universiteit se Camerata-koor wat ook ’n meestersgraad (cum laude) in dierewetenskap behaal het.
Dit was die eerste studie in sy soort in Suid-Afrika om die invloed van klassieke musiek op die stresvlakke van melkkoeie te ondersoek. Die universiteit sê luidens ’n verklaring die bevindinge is onlangs in die wetenskapsjoernaal Domestic
Animal Endocrinology gepubliseeer.
“Die gesondheid en welstand van melkkoeie gaan hand aan hand met doeltreffende en volhoubare melkproduksie,” sê LizeMari oor die belangrikheid van die omgewing waarin plaasdiere aangehou word. Sy glo om ’n stimulerende omgewing vir die koeie deur musiek te verskaf, dra by tot die bevordering van hul welstand en ander behoeftes.
Oor haar keuse van rustige klassieke musiek sê sy vorige navorsing in die buiteland het al bevind dat melkkoeie stadige musiek bo vinnige musiek verkies, asook instrumentele klassieke musiek bo rock of Latyns-Amerikaanse musiek.
DIRK DE BEER skryf: My pa se radio was ook altyd aan in die melkhuis. TILLA HERWOOD skryf: Goed vir mense ook.
JOHAN SCRIBANTE skryf: Ons weet dit al 50 jaar lank. Geen studie daaroor nodig nie.
CHRISTA STEYN skryf: As ek ’n koei was en na klassieke musiek moes luister, het my melk opgedroog!
BRUWER DOREEN skryf: Ons het jare lank gemelk, en musiek gee maar net rustigheid. Ons het nou net vier Jersey-koeie waarmee ons kalwers grootmaak. Ek melk die een sommer self met die hand vir die huis, en fluit vir haar terwyl ek haar melk. As ek dit nié doen nie, lyk sy sommer verdwaas. Ek gaan dit met my hoenders ook toets. Miskien lê hulle meer eiers per dag.
ESTELLE MARAIS skryf: Moenie die mag van musiek onderskat nie!
ELIZABETH OH skryf: Alles is beter met klassieke musiek.