Kultivars wat landbou vorentoe vat

Beter saad én gunstiger omstandighede as gevolg van bewaringsboerdery het groot verskille aan die stabiliteit en produktiwiteit van koringboerdery gemaak, sê Kobus Dippenaar en Cobus Bester van Moorreesburg, Leon Groenewald van Caledon en Niekie Mouton van Eendekuil.

Almal sonder die koms van Sensako se SST-kultivars uit as ’n wending in koringboerdery, met SST 88 as een van die suksesvolste kultivars van die afgelope 30 jaar.

Die sukses van SST 88 word toegeskryf aan ’n goeie wortelstelsel wat die kultivar ook relatief droogtebestand maak. “SST 88 is van daardie solid kultivars. Hy drop jou nooit nie,” sê Dippenaar.

Groenewald meen dit is ’n langgroeikultivar wat jy moet weet hoe om te behandel.

Dippenaar, Bester en Dirk Lesch van Malmesbury sê in die era voor die “SST’s” was Palmiet ’n baie goeie kultivar.

Deesdae is dit egter SST 0166, sê Lesch en Bester.

Vir húl omstandighede is en bly die lusernkultivar

SA Standaard die beste, sê Laubscher Coetzee van Oudtshoorn.

“SA Standaard is droogtebestand en baie goed weidingsbestand. As hy by ons gevat het, is hy amper soos onkruid. Die fout wat mense partykeer maak, is om te dink omdat hy so droogtebestand is, hoef jy hom nie water te gee nie. As jy hom behandel soos die ingevoerde kultivars, is hy net so goed.”

In die mieliebedryf was verbeteringe in die laat 1980’s tot 1990’s te danke aan PAN6479, wat Kobus van Zyl, landboukundige by Omnia, as ’n groot staatmaker beskou. “Daarna het Carnia CRN 3549 goed gevaar. Al het sy graad probleme gegee, was die opbrengspotensiaal goed.”

CRN 3505 het kort daarna die voortou gevat, sê Van Zyl. “Dit was ’n kultivar wat teen lae stand steeds baie goeie opbrengste gelewer het.”

Die era van geneties gemodifiseerde mieliekultivars, met Bt- en Roundup Readygene het daarna begin.

Willem van Zyl van Hoopstad sê hul mielie-opbrengste het ’n hupstoot met die koms van Monsanto-kultivars (Dekalb) begin. “Ons gemiddeld was 5-6 t/ha voor dié kultivars. Dit het gestyg tot gemiddeld 8,6 t/ha tot

9,9 t/ha voor die afgelope drie versuipjare.”

In die “versuipjare” het hy gemiddelde opbrengste van 5,5 t/ha, 7,9 t/ha en 8,1 t/ha behaal.