Leer by varke oor dieet?
VOEDINGKUNDIGES kan gerus meer met hul kollegas in die varkbedryf gesels, sê dr. Theo van Kempen van die departement dierewetenskappe aan die Universiteit van Noord-Carolina in Amerika, luidens die artikel “Eat like a pig to combat obesity” in die vaktydskrif Metabolites.
Varke en mense is van ouds af omnivore wat eens vrugte en wortels, eiers, insekte, heuning en vleis geëet het. Hul spysverteringstelsels stem ooreen.
“Meer navorsing oor varkvoeding is al gedoen omdat gekontroleerde voedingsproewe baie makliker is by diere as by mense. Om varkdata ‘te leen’, is dalk nader aan die waarheid as om geen data te hê nie, veral in die lig van dieetgiere wat verskyn en verdwyn,” luidens die artikel.
“Emosies vuur moderne mense se dieet aan. Hulle eet op tye van die dag wat inskakel by hul sosiale norme. Mense eet wanneer dit hulle pas – en waarvan hulle hou. Daarteenoor probeer varke hard om op tye te vreet wat ooreenstem met hul fisiologiese en endokriene vlakke. Hulle verkies klein ontbyte en groter middagetes. Hoewel hulle ook sekere kossoorte onsmaaklik vind, sal hulle dit wel inneem as hulle moet.”
Varke kan skynbaar probleme met insulienvlakke aanvoel, en sal hul voedselinname verminder om ernstige vetsug te voorkom – ’n vermoë wat die mensdom lankal verloor het.
Volgens Van Kempen het varke selde probleme met vetsug of diabetes, selfs wanneer hulle ’n rantsoen gevoer word wat gelykstaande aan gemorskos is.
Dit is omdat kommersiële varkrantsoene gebalanseerd is vir elke voedingstof. ’n Rantsoen met min mikrovoedingstowwe kan vetsug by hulle aanwakker.
Kilojouletellings is die grondslag vir varkrantsoene en word baie akkuraat bereken en toegepas.
“Die meeste mense behoort gewig te verloor deur minder energie in te neem as wat nodig is vir onderhoud en hul fisieke aktiwiteit. Dit kan gedoen word deur minder koolhidrate te eet, asook kleiner maaltye meer dikwels, en oor te skakel na styselsoorte soos mielies en aartappels met baie amilose.”
Die feit dat varkrantsoene gebalanseerd is, kan belangrik wees vir mense se gesondheid, veral wat vetsug betref.