Navorsing oor siektevrye uitvoervrugte: Bedryf vat voor
NAVORSING word verskerp om te voorkom dat vrugte-uitvoerders en -bemarkers se produkte oorsee afgekeur word.
Phyla, fitosanitêre laboratorium van die sagtevrugtebedryfsorganisasie Hortgro, is onlangs op Stellenbosch in gebruik geneem, en is gemik op fitosanitêre na-oes-behandelings wat kan voorkom dat ongewenste insekte en patogene saam met vrugte verskeep word.
Vir dié doel is ’n ou skaapskuur op die Welgevallen-proefplaas van die Universiteit Stellenbosch teen byna R7 miljoen opgeknap. ’n Bestaande insektarium is behou, waarin onder meer valskodlingmotte en vrugtevlieë vir navorsingsprojekte geteel word. Vier koelkamers is ingerig waarin tot 3 500 kg vrugte in elk opgeberg kan word.
Die behandelings sal nie die gehalte van uitvoervrugte in die gedrang bring nie, en strook ook met huidige gesondheids- en omgewingsriglyne. Toetse sal ook gedoen word om bestaande protokolle te verbeter.
Die laboratorium is ’n nuutjie vir die plaaslike sagtevrugtebedryf, wat voorheen op ander soortgelyke kommersiële aanlegte aangewese was om verwante navorsing te doen. Die totstandkoming is aangevoor deur Hortgro se kern-en-steenvrug-afdeling en die na-oes-innovasiefonds. Dié vennootskap tussen die private en openbare sektor betrek ook die departement van wetenskap en innovasie en die varsprodukte-uitvoerforum van Suid-Afrika.
“Suid-Afrika se sagtevrugtebedryf steun sterk op uitvoer. Dit is ook die mark waar ons van die grootste kwessies ervaar. Met Phyla neem ons bedryf verantwoordelikheid vir sy toekoms,” het Jacques du Preez, Hortgro se hoofbestuurder vir handel en markte, by die opening gesê.
“Nou kan ons dinge self doen, volgens ons eie behoeftes en tydlyne. Ons lewer ’n diens aan die bedryf en help ontwikkel ook ’n nuwe generasie navorsers.
“Fitosanitêre maatreëls behels deesdae heelwat meer as om net seker te maak dat geen ongewenste insekte en ander plae saam met uitvoervrugte verskeep word nie. Behandelings moet omgewingsvriendelik wees en strook met ál strenger vereistes van uitvoermarkte in byvoorbeeld die Europese Unie en Asië.”
Dr. Shelley Johnson, projekleier en fitosanitêre spesialis, het gesê Phyla se uiteindelike mikpunt is om toegang tot internasionale markte te verseker.
Volgens dr. Renate Smit, bestuurder van die navorsingseenheid, is geïntegreerde navorsing op sagtevrugte moontlik omdat eksperimente gelyktydig op vrugte én insekte gedoen kan word. Projekte word tans onderneem oor berokingsmetodes en die opstel van optimale koue temperature om te verseker dat geen vrugtevlieë, myte en motte in verpakte vrugte oorleef nie.