Watter drie staan vir jou uit?

Die een waaroor ek die blyste was, was in die Wêreldbekereindstryd in 2019 teen Engeland toe ek vir Cheslin Kolbe die bal kon aangee — ek was net te moeg om self te hardloop en hy was in ’n beter posisie — en hy kon gaan druk, en toe weet ek ons wen die wedstryd en Wêreldbeker. Ek dink dit was die beste pass vanmylewe.

Watter Wêreldbekeruitslag het jy glad nie verwag nie?

Toe Japan die Springbokke geklop het! En toe Engeland vir Nieu-Seeland in 2019 geklop het, veral oor die manier waarop hulle gespeel het. Dit wys jou net, as die span wat op dreef is iets régtig wil hê, kan hulle enigiemand van die veld af speel.

Wat is jou voorspelling vir vanjaar se Wêreldbekertoernooi?

Die Bokke gaan wen, hoe anders? Nee, ek dink die Bokke gaan régtig wen. Dit gaan waarskynlik een van die mededingendste Wêreldbekers wees. Ek dink daar gaan amper twee keer meer Suid-Afrikaners Wêreldbeker toe as in 2019, en die mense is passievol en opgewonde. Dit gaan ook ‘n baie spesiale Wêreldbeker wees in dié opsig dat hierdie groep vir ’n laaste keer bymekaar gaan wees voordat nuwe spelers begin inkom.

Watter lewensles het jy al by ’n afrigter of spanmaat geleer?

Rugby het my geleer dat niks so erg is as wat jy dink nie. Ek was al baie beseer, en dan was ek teleurgesteld en hartseer, maar het elke keer herstel. Op die ou end sal ek die beserings vir niks verruil nie, want dit maak die hoogtepunte net soveel beter. Dit is dieselfde met verloor. Ons het al sleg verloor — 57-0! — maar dan kom die son die volgende dag weer op. Jy moet net buite die water staan, rustig wees en die groot prentjie in gedagte hou.

Is daar ’n rugbytoer wat vir jou uitstaan?

Ek hou daarvan om Brittanje toe te gaan vir die einde-van-die-jaar-toer. Die ondersteuning is goed, dit is lekker velde en lekker rugby. En dit is maklik om soontoe te reis.

Vertel ’n bietjie wat agter die skerms tydens toere gebeur?

Dinge raak baie professioneel; daar is pret en so aan, maar ons is heeldag besig. Daar is nie juis tyd vir ander dinge nie, buiten om soms gholf te speel op ’n afdag. Alles is ook deesdae op sosiale media, dus moet jy versigtig wees wat jy sê en doen.

Dit is nie ’n geheim nie, maar die aand ná die laaste game van elke toer is wanneer almal hulself net geniet en lekker kuier. Dit is wanneer ons kontiki hou en almal wat drooggemaak het, se stories uitkom.

Die vier broers van Kloovenburg. Van links is Daniël, Johan, Pieter-Steph en Anton.