Langlewendheid ’n onderskatte eienskap
Langlewendheid is ’n onderskatte teeleienskap wat stoet- en kommersiële boere gerus kan oorweeg, sê Zippo Lamprecht, Boran-stoetteler van Dewetsdorp.
Einde April vanjaar het LB5X, ook bekend as Legacy, ’n Borankoei van Radie Loubser en Zippo Lamprecht van Dewetsdorp se Umoja-stoetery haar 20ste verjaardag gevier. Volgens Logix se data was sy toe die oudste produserende Boran-koei in Suid-Afrika. Daar is nog drie ander Borankoeie wat later vanjaar dieselfde ouderdom sal bereik.
Beesboere ag nie die ekonomiese waarde van langlewendheid as teeleienskap hoog genoeg nie, sê Zippo.
Hy verduidelik in ’n normale beesboerdery word ’n stelsel van vervangingsverse gebruik wat die ouer koeie vervang namate hulle uitgeskot word. “As jou koeie langlewend is, gaan jy dalk ’n kleiner persentasie vervangingsverse hoef aan te hou. Dit maak dit weer vir jou maklik om ’n veiling te hou, want jy hoef nie soveel verse terug te hou nie.”
Sulke koeie gee ook vir boere wat hul kuddes wil uitbrei die geleentheid om te vergroot. “Hulle gee jou daardie ekstra ses jaar en produseer nog net so goed soos die ander koeie, veral as jy hulle ook laat spoel.”
Vanuit die kommersiële boer se oogpunt is langlewendheid steeds ’n bonus. “Tot aan die einde van haar lewe gee sy elke jaar ’n kalf. Dit is dus ’n bykomende R8 000 teen dieselfde prys.”
As oor ou koeie gepraat word, dink ’n mens aan koeie wat agt of nege jaar oud is. Maar op Zippo se plaas het hy 30 koeie wat van 10 tot 20 jaar oud is, en hy gebruik bulle wat al 13 of 14 jaar oud is en steeds ’n trop koeie met gemak kan dek. “Die diere, veral die Afrika-rasse soos Borane, wys nou vir ons hoe oud hulle werklik kan word en steeds produktief kan wees.”