Al die nuutste trekkers en werktuie op een plaas
Dit is weer tyd vir die Val-boeredag. Vanjaar beloof om groter as vantevore te wees. Soos altyd vind die boeredag plaas op die eerste Woensdag in Julie op Val, Mpumalanga. Dié klein dorpie word jaarliks deur duisende mense met ’n groot liefde vir die boerdery en buitelewe besoek.
Oudergewoonte is AFGRI weer die hoofborg van die Val-boeredag en vier dit saam met sy 100ste bestaansjaar. Om dit nog meer spesiaal te maak, is AFGRI Equipment, ’n afdeling van AFGRI, vanjaar al 60 jaar lank ’n John Deere-handelaar. Hierdie groot gebeurtenisse getuig van die groei wat dié landboureus oor generasies getoon het, en is ook ’n gebaar van dankbaarheid aan die boerderye en geslagte boere wat die maatskappy ondersteun.
Elke jaar probeer verskaffers van landboutoerusting hul nuutste en tegnologies gevorderdste oplossings op die Val-boeredag wys. Vanjaar is geen uitsondering nie, en AFGRI Equipment sal ’n verskeidenheid nuwe werktuie daar hê om te besigtig en in aksie te beleef.
Die nuwe John Deere 6140B-trekker het hom al as betroubaar, sterk en bekostigbaar bewys. Dit lewer 104 kW uit ’n John Deere-staatmaker-sessilinder-enjin. Só is daar ook ’n paar nuwe toevoegings in die 9R-klas en ’n planter wat die meeste kommersiële boere na hul asem sal laat snak. John Deere gaan oudergewoonte uitmuntende presisieboerderytoebehore op die Val-boeredag demonstreer.
AFGRI Equipment sal, soos verlede jaar, ’n reeks konstruksietoerusting op die dag hê en talle John Deere- en Wacker Neuson-produkte vertoon.
“Ons sien daarna uit om met ons klante te gesels oor maniere waarop ons hul ondernemings kan bystaan met die beste produkte, naverkopediens en die verskaffing van onderdele. Daar sal ook klere en speelgoed van John Deere wees om enige besoeker se boerehart warm te laat klop. Kies en keur, maar maak seker dit sê John Deere!” sê Etienne Meyer, bemarkingsbestuurder by AFGRI Equipment.
Die Val-boeredag bied ’n wonderlike geleentheid aan die mark as een van die boeredae waar demonstrasies nog plaasvind om die bewerking en impak van verskillende fabrikate en bewerkingsmetodologie te wys en te kan vergelyk. Die verskeidenheid produkte wat beskikbaar is, is ongeëwenaar in Suid-Afrika wat demonstrasies betref.
“Die Val-boeredag gee ons as AFGRI Equipment die geleentheid om nie net toerusting te kan wys nie, maar ook om van Suid-Afrika se beste kundiges beskikbaar te stel vir gesprekke met die gehoor of op ’n persoonlike grondslag,” sê Etienne.
“Ons kan nie meer wag nie! Kom ervaar self die AFGRI Equipment-voordeel.”