Beter spuite, hanteerder speel klaar met enige taak
New Holland Landbou het vanjaar talle besoekers na die Nampo-oesdag gelok met die bekendstelling van sy nuwe TH7.32-teleskopiese hanteerder en die verbeterde SP310F- en SP380F-reeks Guardian-voorbalkspuite.
Die reeks betroubare Guardian-spuite is met die gevorderde presisietegnologie van Raven geïntegreer en toegerus met die hoë kraglewering en groot tenks waarvoor New Holland-spuite bekend is. Hulle is gevolglik doeltreffender en kan meer hektare per uur bespuit.
“Die veranderinge wat aan die Guardian-voorbalkspuit aangebring is, verhoog die operateurservaring in die kajuit aansienlik, terwyl die akkuraatheid van die toepassing en die gehalte van die data wat ingesamel word, soveel beter is,” sê Jason Hardy, internasionale produkbestuurder vir New Holland Spuite.
“Hierdie verbeterde eenhede verbind baie komponente van ’n toepassing, asook datapunte vir eienaars en operateurs om doeltreffender en winsgewender te wees. Dit bemagtig hulle om ingeligter agronomiese en logistieke besluite te kan neem.”
Die reeks Guardian-spuite beskik oor Raven se Slingshot®tegnologie, asook oor die verbeterde IntelliSpray™ II en Connected Workflow™.
Die data wat uit hierdie funksies verkry word, word versamel, verwerk en in die Connected Workflow-stelsel saamgevoeg. Die Connected Workflow-stelsel sinchroniseer data van die kantoor na die land en weer terug vir vereenvoudigde bestuur van werktyd, ledige ure en reistyd.
Die data kan gebruik word om programme en strategieë te skep, soos voorskrifte vir onkruiddoderdosisse vir individuele lande, en is vir die operateur toeganklik deur die Slingshotmobiele toepassing.
IntelliSpray™ II bied een van die mees presiese spuitpuntbeheerstelsels op die mark. Dit verseker uitstekende druppelbedekking-akkuraatheid – tot 2,5 keer akkurater as vergelykbare stelsels.
Hierdie verbeterings help operateurs en produsente om dekking te optimaliseer, oorslaan en oorvleuelings te verminder en insetkoste te verminder.
Die Slingshot-toepassing bemagtig operateurs en produsente om meer datagedrewe besluite op en van die land af te neem. Slingshot genereer ’n hoëvlak-datavisie van begin tot voltooiing van ’n taak en sluit naspeurbaarheidsverslae, toepassingsrekords, doeltreffende spoorbewerkings en oordraagbare werktake in.
Saam met die Slingshot-telematika lei die VSN® Visual Guidance tot beter data-insameling. Danksy die jongste beeldsensor en verwerkingstegnologieë lei dit ook tot beter spuitbeheer, ’n vinniger reaksietempo en verminderde moegheid van die operateur.
Hierdie komponente kan doeltreffendheid met tot 20% verbeter. Om hierdie take uit te voer, gebruik die visuele leidingstelsel kameras en radar om die spuitbalk en dryflyn van die spuit te lei.
“Ons streef daarna dat operateurs volkome gemoedsrus moet hê wanneer hulle in die kajuit van die Guardian-spuit is,” sê Jason. “Die integrasie van die VSN-stelsel stel bestuurders in staat om die spuit teen 5-6 km/h vinniger te bespuit om meer hektare per dag te dek, sonder om gewasskade te waag.
“Die basiese VSN-stelsel volg die rye met kameras, en die VSN+-stelsel stel operateurs in staat om verborge waterweë en ander hindernisse beter te sien. Dit verlig baie van die saamgestelde moegheid en stres wat operateurs ervaar wanneer hulle lang ure op die land deurbring.”
Teleskopiese hanteerder
Die nuwe TH7.32-teleskopiese hanteerder van New Holland kan voorwerpe so hoog as 7 m lig, het ’n kapasiteit van 3,2 ton en bied ’n ultra-gemaklike, ruim kajuit met ’n volledige 360°-uitsig. Dié stabiele en maklik bestuurbare werktuig kan enige taak op die plaas baasraak en beskik oor 4x3 PowerShift™-transmissie, hidrouliese vloei van 140 liter/min. en ’n kragtige 98 kW-enjin wat 549 Nm-wringkrag teen 1 500 r/min. lewer.
Jaco du Preez, bemarkingsbestuurder van New Holland Landbou, sê dié maatskappy se teleskopiese hanteerders lewer al meer as 20 jaar ’n deurlopende, doeltreffende diens wat prestasie, betroubaarheid en bekostigbaarheid verseker.
“Die nuwe TH7.32 is die ideale keuse vir gemengde boerderye, akkerbou- en kontraktoepassings. Met sy hoë krag-totgewig-verhouding wat die moeilikste take in allerlei toestande moontlik maak, is dit die eerste keuse vir veeleisende plaas- en kontrakoperateurs.”
///
Tel: +27 11 921 5002