Waardevolste bedryf skep ook enorme waarde as grootste verbruiker van voer
Die braaihoenderbedryf is waardegewys die grootste landbousektor in SuidAfrika en kan volgens prof. Ferdi Meyer van die buro vir voedsel- en landboubeleid (BFAP) baie bydra om landbougroei te bevorder.
Die bedryf se jaarlikse inkomste is sowat R50 miljard en dit dra 16% tot die landbou se bruto binnelandse produk by, terwyl die beesvleissektor 12,2% bydra en die mieliebedryf 10,5%.
Die bedryf is verantwoordelik vir 50% van die land se voerverbruik en as ’n mens lêhenne bytel, is dit 60%.
Dit is ’n baie diverse sektor met van groot geïntegreerde maatskappye tot ’n groot getal kleiner boere wat hoenders lewend verkoop. (GRAFIEK 7). Laasgenoemde se produksiekoste is beduidend hoër as dié van produsente met grootskaalse bedrywighede.
Die bedryf het sowat
50 000 mense regstreeks in diens en nog baie meer onregstreeks.
Hoendervleis se aandeel in Suid-Afrikaners se verbruik van vleis het van 62% in 2010 tot 66% in 2021 gestyg. In dié tydperk het die braaihoenderbedryf 500 000 ton tot die verbruik van vleis toegevoeg.
Die bedryf ding weens invoer regstreeks met groot internasionale produsente mee en moet daarom mededingend wees. Mededingendheid is ook
belangrik as hy wil uitvoer.
“Die bedryf het ondanks verskeie probleme sterk gegroei en regtig goed gedoen. Dit het die afgelope paar jaar beduidende vordering gemaak om invoer te vervang.
“Produsente het die gaping benut en dit met plaaslike produksie vervang, wat ’n suksesverhaal is,” sêMeyer.
Produsente kry egter tans swaar weens hoë voer- en beurtkragkoste. Boonop is verbruikers ook onder druk.