‘Verwerk akkurate data reg — anders mors jy jou tyd’
Vanjaar se titelhouer van Stamboek se Vleisbeeskudde van die Jaar is Frikkie Kruger, wat op Waterpaslaagte by Boshof in die Vrystaat met Bonsmaras boer.
Weidings is dié datagedrewe boer se groot bate, en daarom is hy eerstens ’n grasboer wat weidings bestuur vir ’n volhoubare boerdery.
Watter tegnologie maak die grootste impak op jou besluite en winsgewendheid?
Ons gebruik ’n weidingstelsel wat ontwerp is deur die landboukundige Riaan Dames van Best Farmer SA, waarvolgens 50% van die veld per jaar benut en die ander helfte gerus word.
Die jongste beskikbare tegnologie van veevoervervaardigers word aangewend.
Rantsoene vir fase Dveld
toetse word self gemeng van eie grondstowwe, soos mieliekuilvoer, maar die konsentraat kry ons van Telwiedre-voere.
As Bonsmara-teler is datainsameling die kern van my boerdery. Data word ingevoer op BenguFarm, waardeur data verwerk en aan Stamboek deurgegee word. Vereiste data sluit in geboortegewig, speengewig, fase D-toetse, marmering en oogspiergrootte. Die akkurate insameling van data is ’n voorvereiste.
Watter inligting buiten Blup en data-aantekeninge gebruik jy?
Blup en die data-aantekeninge rakende teelwaardes is die kern wat verwerk word. Indien jy nie die inligting wat jy kry, gebruik nie, mors jy jou tyd.
Dit word gebruik om teelwaardes vir dekgroepe saam te stel en te bepaal watter bulle by watter koeie gebruik word. Syfers word gebruik om groot speenkalwers te teel, sonder dat die koeie te groot word en geboortegewig styg.
My kuddedoelwit is om feitlik al die eienskappe bo die rasgemiddelde te hou, sonder dat uiterstes geteel word. Die balans tussen die dier en jou omgewing is baie belangrik. Die inligting word aan stoet- en kommersiële kopers oorgedra.
Wat is die belangrikste inligting wat ’n ekstensiewe beesboer moet aanteken?
Die minimum gegewens is gewig, veral geboorte- en speengewig. Data van elke dier is belangrik en diere moet genommer word, hetsy met oorknippe of plaatjies. Só weet jy ten minste of ’n koei elke jaar ’n lewensvatbare kalf gee.
Watter nuwe veetegnologie maak jou opgewonde?
DNS-ontwikkeling maak dit moontlik om vaderskapsbepaling te doen. Meerbulparing kan dus gedoen word. Dit is ook ’n doeltreffende hulpmiddel om die miostatienmutasiegeen-status te bepaal. Die inligting word in die veilingskatalogusse gepubliseer. Genomika verhoog die akkuraatheid van teelwaardes.
Wat beteken volhoubaarheid binne jou kudde vir jou?
Boer so produktief moontlik en moenie altyd die maksimum speengewig najaag nie. Kry ’n balans tussen jou insette en weidings, en sorg dat jou weidings altyd in ’n goeie toestand is. Só hoef jy nie onnodige byvoeding te gee om droogtetoestande te oorleef nie.