Al 60 jaar plus ’n datavoorloper

Robbie Meintjes van Griekwastad is die eienaar van die oudste prestasiegetoetste Dorper-stoetery in Suid-Afrika, en dit is ook vanjaar Stamboek se Elitekleinveekudde van die jaar.

Teelmateriaal wat uit die baanbrekerstoeterye in die Dorper-bedryf stam, is die spil waarom dié stoetery draai.

Wat is die belangrikste inligting wat jy oor jou kudde insamel?

Die plaas se weiding bestaan uit gemengde bossie- en gras

met struike. My mikpunt is om funksionele en aangepaste Dorpers te teel wat goed in veldtoestande kan produseer en reproduseer. Ek hou al die afgelope 64 jaar volledig rekord van speengewig, naspeengewig en ooie se reproduksie. Dit is belangrik om naspeengroei te meet om te bepaal of die dier homself op natuurlike weidings kan handhaaf sonder sy ma se melk.

Wat beteken Blup in jou kudde in ekstensiewe toestande?

Danksy Blup is die syfers nou akkurater en ramme kan met groter sekerheid geselekteer word – uit aanteel, asook met die aankoop van ramme.

Hoe kombineer jy die data en jou eie veekennis om besluite oor jou kudde te neem?

Tydens seleksie word Blup-syfers en alle ander inligting gebruik as eerste sifting. Daarna word diere fisiek bekyk om funksionele foute uit te skakel. Die laaste stap is om te kyk of die dier aan die rasstandaard voldoen. Die ideaal is ooie wat onder normale toestande elke jaar op die veld produseer, met die ram wat op speenouderdom markgereed is. Die ooi moet ook voldoen aan die rasstandaard. Die ramme moet vrugbaar wees om genoeg lammers met ’n karkas van goeie gehalte te lewer. Hoe swaarder die karkas, hoe groter die inkomste.

Wat faktore dra by tot jou winsgewendheid?

Aangepaste diere wat goed reproduseer.