Alle intensiewe stelsels nie gelyk nie...
’n Paar jaar gelede was intensiewe skaapstelsels ’n gonswoord. Is die vraag daarna nog so groot? Giepie
Calldo, veteraan-produksieraadgewer by BKB, meen voor jy oorskakel, is dit noodsaaklik om doelwitte vas te stel. Jy moet ook vinnig kan aanpas en probleme uitskakel wat nie in jou plaasopset werk nie.
Is daar ’n standaardpraktyk of moet dit van plaas tot plaas aangepas word?
Die infrastruktuur moet aanpas by omstandighede, soos weerstoestande in die betrokke lamtyd. Die oprig van duur lamhokskure is baie gerieflik en die beste opsie, aangesien voedingsverliese minder is. Daarteenoor is eenvoudiger stelsels goedkoper, maar dit plaas meer druk op die drooghou van hokke en kos. Bestaande afdakke bied beskerming teen wind, reën en hitte. Son en matige wind is egter nodig om hokke droog te hou. Gesonde lammers hou van droë hokke, met siektes wat onder swak higiëniese
toestande floreer. Bestuur die volgende nougeset: Hulpbronne, soos weiveld. Byvoedingsprogram. Gesondheidsprogram deur inenting en ontwurming. Opgeleide arbeidsmag. Biosekerheid.
Wat is die voor- en nadele van lamhokstelsels?
Die kwessie is om die gelykspeelpunt tussen uitgawes en inkomstes te respekteer. Uitgawes moet jaarliks bepaal word teen die werklikheid van ’n onsekere inkomste van vleis en wol.
Die voordeel van ’n intensiewe lamstelsel is dat lamvrektes in gure én gunstige toestande beperk word. In ekstensiewe toestande is die resultate beduidend laer, maar in goeie weerstoestande kan goeie resultate behaal word.
Jou arbeid en druk van roofdiere bepaal die lamstelsel wat gevolg moet word.
Dit is betalend om meerlinge in hokke te lam. Jongooie wat onder groepsdruk gepaar word, moet almal in hokke lam. Dit verlig arbeidsdruk, en die ooie met swak moedereienskappe kan met lammers en al gemerk en uitgeskot word. Moederinstink word gevestig deur voldoende voeding tydens mid-dragtigheid (dag 56 tot 100).
Watter tegnologie speel tans die grootste rol in die winsgewendheid van ’n skaapboer?
Meet om te weet sodat jy kan bepaal met watter diere jy moet boer. Daardeur kan die volgende besluite geneem word. Raak ontslae van swakker ooie wat deur die rekordhouding uitgewys word. Kondisietelling in kritieke bestuurstydperke.
Die kg lam gespeen per ooigewig gepaar.
Die kg lam gespeen per ooigewig gespeen.
Kg wol geskeer per ooi. Fynheid en prys van wol per jaar. Sonarskandering kan gebruik word om te bepaal of ’n ooi ’n een-, twee-, drie- of vierling het en die voedingsbehoeftes kan daarvolgens aangepas word.
Hoe moet omgesien word na jongooie om ’n veeboerdery winsgewend te hou?
Bepaal die paargewig van jongooie (ideaal 48-51 kg). Gee kruipvoeding as jong lam. Groeiprogram met ’n produksielek.
Gee prikkelvoeding voor paartyd.
Gebruik koggelramme. Groepsdrukparing. Middeldragtigheidsbestuur van dag 56 tot 100. Sonarskandering. Laatdragtigheidsbestuur van dag 101 tot 150. Gebruik ’n lamhokstelsel. Bestuur van lamdag tot 21 dae ná lam (180 dae voor volgende paring). Vroegspeen op dag 100 ná lam; 3 maande en 20 dae rus voor volgende paring.