‘Somerweiding, sonder lyding’
Blaarrykheid, smaaklikheid en hoë gehalte is wat Barenbrug se sorghum en babala enige boer bied.
Suid-Afrika het van die beste boere ter wêreld, maar dit is nie altyd maklik om in hierdie land te boer nie.
Die moeilike omgewingstoestande speel ’n groot rol in die struikelblokke wat boere moet oorkom. Daarom is dit belangrik dat boere altyd die regte gewasse en kultivars kies wat die risiko’s in ag neem.
Sorghum
Bargrazer is seker die bekendste voersorghumkultivar in Barenbrug se reeks. Dié kultivar het ’n groot markaandeel en is gewild onder boere reg oor Suid-Afrika.
Bargrazer is aangepas vir sanderige, klei- en leemgrond en die blaar:stingel-verhouding bied ’n gebalanseerde bron van ruvoer en lewer deurlopende hoë opbrengste met uitstekende voedingswaarde. Beeste kan op ’n planthoogte van ongeveer 75 cm begin wei en skape op ’n hoogte van 50 cm. Om goeie hergroei te verseker, moet jy seker maak die plante word nie laer as 20 cm gesny of bewei nie.
Bargrazer vestig goed wanneer die grondtemperatuur deurlopend hoër as 16 °C is.
Barsweet is die kuilvoerkoning onder sorghums. Dié soet sorghum bied uitstekende kuilvoeropbrengste en het ’n goeie voedingswaarde. Jy kan hierdie kultivar teen ’n laer saaidigtheid plant as voersorghum en teen ’n plantdiepte van 20-40 mm na gelang van die grondsoort.
Rol die land ná plant om goeie kontak tussen die grond en saad te verseker vir ’n goeie, eweredige opkoms.
Babala
Nutrifast is Barenbrug se pronkbasterbabala wat blitsig hergroei en blaarryk is. Hierdie blousuurvrye opsie verseker die boer van hoë gehalte én hoë opbrengste, wat lei tot baie goeie melk- en vleisproduksie. Nutrifast het ’n hoë proteïen- en metaboliese-energie-inhoud wat vergelykbaar is met dié van voerhawer in die winter.
Vroeë beweiding is die geheim tot sukses, aangesien dit die voedingswaarde en smaaklikheid aansienlik verhoog. ’n Saaidigtheid van 8-12 kg/ha word aanbeveel – heelwat minder as gewone babala en sorghum danksy meer sade per kilogram en die gewas se uitstekende stoelvermoë. Barenbrug se algemene babala is ’n blousuurvrye, wyd aanpasbare opsie vir skaap-, bok- en beesboere. Babala maak bestuur maklik met vinnige, maklike en veilige vestiging. Beweiding kan al van vroeg af plaasvind.
Probeer om die gewas nie toe te laat om hoër as 500 mm te groei nie, aangesien die smaaklikheid verlaag verby dié hoogte.
Babala verkies goed gedreineerde grond, maar kan ook op grond met ’n laer potensiaal geplant word.
Sorghum en babala het beter uithouvermoë teen wind, hitte en droogte as ander somergewasse, dus is Barenbrug se somerpakket jou oplossing vir die komende seisoene.