Uit Boerekos
Appel-en-peerrolpoeding
Deeg
480 ml koekmeel
5 ml gemengde speserye 3 ml fyn kaneel
10 ml bakpoeier ’n Knippie sout
125 g koue botter, in blokkies gesny
125 ml koue water
Vulsel
30 ml botter
2 elk pere en appels, geskil, ontpit en in klein blokkies gesny
30 ml sagte bruinsuiker ’n Skeut vars suurlemoensap
Sous
500 ml kookwater 250 ml suiker
15 ml asyn 2 kaneelstokkies 60 ml brandewyn 10 ml vanieljegeursel
Deeg:
Sif die meel, gemengde speserye, kaneel, bakpoeier en sout saam in ’n groot mengbak. Voeg die botterblokkies by en vryf dit met jou vingerpunte in tot die mengsel krummelrig is. Voeg die koue water bietjie vir bietjie by en maak aan tot ’n deeg vorm. Draai die deeg in kleefplastiek toe en verkoel vir minstens 30 minute terwyl jy die vulsel berei.
Vulsel: Smelt die botter in ’n pan. Braai die vrugteblokkies stadig daarin tot dit begin verkleur. Voeg die suiker en suurlemoensap by en braai verder tot gekaramelliseer. Skep uit en laat afkoel.
Sous: Verhit al die bestanddele behalwe die brandewyn en vanieljegeursel saam tot kookpunt en laat kook vir 5 minute. Verwyder van die hitte en voeg die brandewyn en vanieljegeursel by. Hou eenkant.
Voorverhit die oond tot 180 °C en smeer ’n oondbak met botter. Rol die deeg in ’n groot reghoek uit op ’n meelbestrooide oppervlak. Skep die vrugtevulsel egalig oor die deeg en rol dit in die lengte op, soos ’n konfytrol. (As die rol te lank vir jou oondbak is, sny dit middeldeur en sit dit langs mekaar in die bak met ’n klein spasie tussen die twee rolle.) Gebruik ’n skerp mes om insnydings in die bokant van die deeg te maak. Skep die sous versigtig oor die rol. Bak die poeding vir ongeveer 30-45 minute tot die deeg goudbruin en gaar en die sous afgekook en gekaramelliseer is. Laat staan vir 15 minute en sit warm voor met meringue-roomys en vla.