Só sien ander vir Christi
Robert Graaff, uitvoerende hoof van Graaff Fruit
Sy tasbare passie vir alles wat hy aanpak, sy nederige grootword en sy optimistiese houding staan beslis uit. Hy is ’n bewys daarvan dat die landbou ’n goeie loopbaan bied, en nie net vir plaaseienaars nie.
Dr. Ivan Meyer, Wes-Kaapse minister van landbou
Christi van den Heever is ’n welverdiende wenner. Hy is ’n visionêre, hardwerkende en toegewyde boer. Sy agtergrond voorspel net goeie dinge vir sy toekoms, maar ook vir die volhoubaarheid van die landboubedryf. Baie geluk en alles van die beste!
Jerrie Fredericks, produksiebestuurder op Rietfontein
Christi is ’n goeie leier en iemand om na op te kyk. Hy gee duidelike doelwitte waarna ons as ’n span moet werk. Hy gee elke bestuurder onder hom die geleentheid om homself te ontgin, luister na ander se planne en laat ons toe om self planne te beraam. Christi is daar wanneer jy hom nodig het, maar gee jou ook die ruimte om jou ding te doen. Hy is nie iemand wat ’n one-man show run nie, maar is oop vir ander se mening en bied goeie geleenthede vir sy mense om te ontwikkel en te groei. Hy deel in die sukses, maar wanneer dit nie goed gaan nie, vat hy die pak saam met jou.
Marlandi van den Heever, Christi se vrou
Ek het nog nooit meer van ’n mensemens gesien as Christi nie. Sy liefde vir Jesus, sy gesin, die natuur en mense is aansteeklik. Hy leef voluit en bou verhoudings sover hy gaan. Hy het werklik ’n Godgegewe talent, daarom is hy so suksesvol in die landbou. Hy help mense en skep werkgeleenthede waar hy kan. Om te boer, is nie ’n werk vir Christi nie, maar sy passie. As jy doen waarvoor jy lief is, sal jy suksesvol wees. Jesus ken Christi se hart en seën hom ongelooflik baie.
Pierre van den Heever, Christi sebroer
Christi is ’n broer en ’n boer wat van ’n uitdaging hou en dan maak hy seker hy maak ’n sukses daarvan. Hy is lojaal, opreg en baie eerlik. Christi se sukses lê daarin dat hy alle eer aan die Here gee. Hy is ’n boer wat sy medemens goedgesind is.