Druk op grondwater neem wêreldwyd toe
— AMELIA GENIS
NAVORSING
in 40 lande, waaronder Suid-Afrika, toon dat grondwater in baie van dié lande besig is om op te droog.
Prof. Scott Jasechko van die Universiteit van Kalifornië in Amerika en sy medenavorsers het bevind dat die grondwatervlakke in ’n derde van die wêreld se streekwaterdraers die afgelope 40 jaar vinniger gedaal het.
Die navorsers het watergebruik uit 170 000 moniteringsboorgate en 1 693 waterdraerstelsels ontleed in dié lande waar sowat 75% van die wêreld se grondwateronttrekking plaasvind.
Hul navorsing toon dat ’n daling in grondwatervlakke van meer as 0,5 m per jaar algemeen is in die 21ste eeu, veral in droë gebiede, soos Kalifornië, Spanje, Iran en Australië. Dit is gebiede en lande waar daar op groot skaal met gewasse onder besproeiing geboer word.
Hoewel die meeste van Suider-Afrika se grondwater min of meer op dieselfde vlakke gebly het, is daar gebiede waar die daling in watervlakke 0,1-0,25 m per jaar is.
Daar is ook goeie nuus. Die navorsers skryf in hul artikel “Rapid groundwater decline and some cases of recovery in aquifers globally” wat onlangs in die vaktydskrif Nature gepubliseer is, dat daar gevalle is waar waterdraers en boorgate besig is om te herstel ná spesifieke ingryping.
Ingrypingsmaatreëls sluit in veranderinge aan grondwaterbeleid, die verligting van die vraag na grondwater deur groter gebruik van oppervlakwater en groter opberging van grondwater deur die bestuurde aanvulling van waterdraers.
Dié ommekeer toon volgens hulle die potensiaal om die toenemende uitputting van grondwater te keer.
Sulke suksesverhale moet egter op baie meer plekke met dalende grondwatervlakke herhaal word. (Lees ook die berig “Raak die Karoo se water op?” op
Landbou.com by tinyurl. com/ycy9fnma)