Murgpampoentjie van buite, komkommer van binne
Unica Fresh se Zucchiolo het besoekers die meeste beïndruk. Dit is ontwikkel uit ’n murgpampoentjiekultivar wat inheems in Suid-Amerika is. Die werk is gedoen deur die Spaanse instituut vir landbou-en-visserynavorsing en -opleiding (Ifapa) se afdeling vir teling en biotegnologie, met die samewerking van Beyond Seeds.
“Anders as wat ’n mens sou dink, is Zucchiolo nie ’n nuwe murgpampoentjiekultivar nie, maar ’n groentesoort wat ’n hele nuwe produkkategorie op die Europese mark verteenwoordig,” luidens ’n verklaring oor die FLIA-pryse.
Hoewel dit hoofsaaklik in die buitelug geproduseer word, is dit nou danksy hul navorsing ook aangepas vir verbouing in kweekhuise.
Dié smaaklike groente, wat in drie kleure (liggroen, donkergroen en geel) beskikbaar is, weeg sowat 250 g. Dit kan vars en rou in ’n slaai geniet word (soos ’n komkommer), maar dit kan ook soos ’n murgpampoentjie of eiervrug gaargemaak word.
Dit is ryk aan vesel, vitamiene A en C, en antioksidante.
Dit word tans net in Europa verkoop. Die ná-oesleeftyd is besonder lank. Die groente kan drie tot vier weke goed bly, wat dit ideaal vir uitvoer maak.
María de Carmen Tamayo, tegniese bestuurder by Beyond Seeds, het aan Fresh Fruit Portal gesê sowat 8 500 Zucchiolo-plante kan op 1 hektaar geplant word. Die plante begin binne twee maande dra.
“Die produktiwiteit is hoog, en kan 9-11 kg per m² wees.”
Altesaam 50% van die opbrengs uit verkope word deur die Cellbitec-stigting vir maatskaplike kwessies, soos die stryd teen pankreaskanker en degeneratiewe siektes, aangewend.
Volgens Andrea Álvarez, sake-ontwikkelingsbestuurder by Unica Fresh, spoor die pryse die varsproduktebedryf aan om meer waarde tot boere se gewasse toe te voeg.
“Dit is ’n lang proses om nuwe groentesoorte te ontwikkel, maar ons doelwit is om voedsame en gesonde produkte vir die samelewing beskikbaar te stel.”
Alastair Findlay (in sy 80’s) van Bedgrow in Brittanje het dertig jaar gelede, ná ’n besoek aan Amerika, aan homself die taak opgelê om ’n rooiui te ontwikkel wat deurgaans soet is. Die uiteinde was die soet Calypso-rooi-ui wat in 2023 bekend gestel is. Dit het lae piruvaat-vlakke, wat beteken ’n mens kan dit rou eet sonder om bekommerd te wees dat jou mond dalk gaan brand. Die kultivar is al in die Midde-Ooste en Amerika beskikbaar gestel.