Sarah Jane se reis saam met die wilger
Die Delft-styl borde met die wilgerpatroon wat Sarah Jane Jordaan skets, pryk op tafels in restaurante en teen die mure van versamelaars. Dit het dié argitek van nering op ’n nuwe koers gestuur, en deesdae maak sy ook muurpanele en ander opdragwerke.
Vertel meer van jou keramiekreeks wat van alledaagse produkte kunswerke maak.
’n Mens kan seker sê ek is ’n argitek wat kuns skep. Ek konsentreer op pasgemaakte keramiekwerk wat ek in opdrag van kopers skep, of dit nou ’n paar borde of ’n volle stel is. Ek het onlangs ook koppies en pierings gemaak, asook ontbytbakkies. Ek maak ook geteëlde muurpanele wat met die hand geverf word. Buiten die Willows-reeks, waarvan ek voorraad hou om te verkoop, is die res opdragwerk.
Dit het alles begin by jou Travelling Willows-reeks.
Ek het gevind my werk as argitek vereis baie digitale vaardighede. Daarom het ek steeds deeltyds geteken om my te inspireer en my vaardighede te slyp. Nadat ek en Johan getroud is en ek op die Jordaan-familieplaas by De Doorns kom woon het, het ek besef my loopbaan gaan nie werk met die plaasleefstyl nie. My tariewe kon nie die lang afstande wat ek moes ry, regverdig nie. Ek het op my sketse begin konsentreer en ’n geloofsprong gewaag toe ek die Willows-sketse na Mervyn Gers Ceramics geneem het om borde van te maak.
Ek het grootgeword met die borde met die klassieke wilgerpatroon. Die meeste van ons ma’s of oumas, of iemand wat ons ken, het sulke borde. Ek het met die wilgerpatroon begin speel om dit moderner te maak. Só het die idee ontstaan om stede te teken met die wilgerpatroon wat amper soos ’n lens die stede omraam. Dit is ’n figuurlike storie van hoe die wilger sy tuiste vind in stede reg oor die wêreld.
Ek het met Londen begin, waar die eerste wilgerpatroon ontwerp is, en toe op ’n reis deur die Ooste en Weste gegaan, tot in Suid-Afrika. Die Willows-reeks het in die grendeltyd behoorlik posgevat, veral toe ek plaaslike stede soos Johannesburg, Kaapstad en Durban ingesluit het.
Watter medium gebruik jy?
Ek put baie vreugde daaruit om basiese toerusting te gebruik om te wys wat dit kan doen. Daarom teken ek graag met ’n Bic-pen. Ek gebruik ook gewone verf en glasuursels.
Hoekom het jy aanvanklik hande gevat met ander kunstenaars pleks daarvan om alles self te doen?
Aanvanklik het ek net my sketsboek gehad en geen keramiektoerusting nie. Ek wou eerder met plaaslike, etiese entrepreneurs saamwerk as om grootmaatvervaardigde borde te gebruik. Mervin Gers Ceramics, wat ook ’n groot opheffingsprojek het, was die regte keuse. Dit het ’n goeie reputasie, wat die samewerkingsooreenkoms nog beter gemaak het. Dit het ook my reputasie as oorspronklike kunstenaar gevestig.
Ek wou egter meer van my werk self skep en die waardeketting verkort. Danksy ’n klein lening van my man kon ek in ’n ateljee en tweedehandse pottebakkersoond belê. Ek werk steeds saam met Mervin Gers Ceramics, maar gee deesdae baie aandag aan dit wat ek self kan doen.
Hoe bemark jy jou werk?
Baie daarvan is danksy mense wat van my ware by ander mense sien. Die Travelling Willows is ’n wonderlike stuk bemarkingsgereedskap. Mense sien dit raak tydens etes by vriende, of hulle gee dit vir mekaar as geskenke. Dié mense soek my op en bestel nog. Daar is ook bestellings van Suid-Afrikaners wat oorsee woon en wanneer hulle kom kuier, bestel hulle borde om terug te neem na hul vriende.
Ek wil nie hê dit moet versamelaarstukke wees nie, dit moet gebruik en geniet word. Ek het al aanbiedings vir ’n franchise gekry, maar dit sou nie reg wees teenoor my lojale klante nie. Ek sal dus altyd op kleiner skaal artikels maak.
Ek het ’n webtuiste, maar omdat Instagram so ’n visuele platform is, probeer ek dit gereeld bywerk. Ek beskou my Instagram-profiel as ’n aanlyn galery waarvan ek die kurator is.
Ek het al aan markte deelgeneem, maar omdat ek so baie opdragwerk doen, het ek nie noodwendig voorraad vir markte nie. Ek het ook onlangs met Armand Aucamp saamgewerk vir die televisieprogram Klein sake, groot drome op Via, waaruit ek goeie blootstelling gekry het. Ek is altyd oop vir sulke geleenthede. ’n Deel van my bemarking is strategiese co-labs met ander entrepreneurs.
Jy werk ook saam met die bekende sjef Jan-Hendrik van der Westhuizen. Kan jy al meer verklap oor jul projek?
Ek werk saam met hom en ’n ander maatskappy aan ’n projek. Ons ontwikkel tans die ont