Goeie biosekerheid sorg vir topsukses
Hou die kudde geslote en stel ’n behoorlike biosekerheidsplan vir beeste en mense in werking. Dít was die beste raad wat die eienaars van vanjaar se PinZ2yl-elitekoei gekry het toe hulle hul stoetery begin het. Vandag pluk hulle die vrugte van hierdie raad.
Siektebekamping is oral belangrik om die verspreiding van siektes hok te slaan. Dit geld ook by Marken in Limpopo waar Bennie en Cecilia van der Linde hul BergAlleen PinZ²ylstoetery bedryf.
Beeste wat ingekoop word, word slegs by bekende telers met voldoende gesondheidsertifikate bekom. Dan word die diere eers in kwarantyn gehou.
Die egpaar het die Elitekoei, PZ 13-238, in 2016 saam met 21 ander stoetbeeste as ’n dragtige vers gekoop – in dieselfde jaar dat hulle die BergAlleen-boerdery se stoetery geregistreer het. Wyle Paul Bester het die beeste vir hulle in Bertie Van Zyl (Edms.) Bpk. se Mathomo-stoetery by Mooketsi uitgesoek.
Met hierdie aankoop het Bennie en Cecilia ’n reëling gehad om gesonde, geleende bulle vir twee dektye te gebruik om hul genetiese poel te verbreed. In die derde jaar het hulle ’n bul gekoop. Die interrasbeoordelaar Martin Seyfferdt het dié bul raakgesien en hulle aangeraai om hom eerder te slag, want hy het strukturele foute gehad.
Toe koop hulle ’n goeie bul by die Bakari PinZ²yl-stoetery van Pretoria.
Daarna het hulle hul eie bulle geteel en met deeglike bestuur en beplanning ’n kudde opgebou met goeie melkeienskappe, koeie wat maklik kalf, gehardheid, vinnige groei en goeie moedereienskappe.
Puik kalfrekord
Die Elitekoei se kalfrekord van agt kalwers en ’n tussenkalfperiode van 368 dae spreek boekdele. Sy is weer dragtig. Sy is fenotipies korrek met besonder goeie moedereienskappe en melkproduksie en -gehalte. Boonop pas sy haar kalwers goed op en staan nie verniet as Kwaai Koei bekend wanneer sy ’n klein kalfie het nie.
Haar eerste bulkalf, BB 17-16, word steeds as ’n kuddevaar gebruik.
Dit is die stoetery se eerste Elitekoei, hoewelhyalverskeiekereSAStamboekseElitevleisbeestoekenning ontvang het – brons in 2018 en 2019 en silwer sedert 2021.
Geseën met goeie weiding
Die plaas is op ’n vlakte aan die noordelike voet van die Waterberg geleë. Ondanks die afgelope somer se skrapse 300 mm reën bied die gras en rosyntjiebosse op sanderige grond steeds goeie weiding. Na gelang van die seisoen en reën gebruik hulle Alzu se winter- of somerlek in blokvorm vir minder vermorsing en matige inname.
Die somers is besonder warm en die kwik daal in die winter soms tot onder vriespunt. ’n Swaar bosluislading en gepaardgaande siektes word met ’n dipprogram aangedurf.
Die plaas is met soetveld geseën, met ’n verskeidenheid grasse, soos Eragrostis, vingergras, rooigras en bloubuffelgras. Die plaas is in 15 kampe verdeel met waterpunte in elke kamp wat van ’n sentrale dam af volgehou word. Hulle pas drukbeweiding toe.
’n Dektyd met natuurlike dekking deur gekose bulle word gevolg, sê Bennie.
Hoewel ’n plaas en beesboerdery nooit deel van Cecilia se drome was nie, is sy van die begin af betrokke.
Sy behartig die administrasie op Logix, wat grootliks tot hul eerbewyse bygedra het, sê Bennie. “Ons is dus ’n goeie span, al is sy steeds heeltyds in haar regspraktyk in Pretoria.”