Wees gerat vir die tweede Baleia
Baleia Wines, geleë langs die N2 naby Riversdal, bied op 9 September hul tweede jaarlikse bergfietsuitdaging, tesame met ‘n veldwedloop ( trail run) aan.
Wynmaker en algemene bestuurder, Abraham de Klerk, self ‘n entoesiastiese branderplankryer en bergfietsfundi, asook die Baleia Wines-span is opgewonde om dié uitdaging ‘n tweede keer aan te bied, met De Klerk wat daarna uitsien om weer deel te neem.
“Ons eerste aanbieding in 2016 was goed ontvang en het deelnemers van sover as Kaapstad gelok. Ongelukkig was die weerhane nie aan ons kant nie, maar kon deelnemers en toeskouers steeds hul besoek aan Baleia Wines se proelokaal en etes by La Bella Deli & Restaurant geniet,” aldus De Klerk. “Dié jaar hoop ons vir ‘n heerlike sonskyndag sodat gaste en deelnemers waarlik die mooi van ons groen weivelde, geel canolabloeisels, oranje aalwynvlamme en oop grondpaaie kan waardeer – alles natuurlik onder die wakened oog van die Slapende Skoonheid.”
Die veldwedloop-roete sterk oor 12km en begin en eindig by die Baleia Wines-kelder. Die wedloop begin om 09:00 en die koste beloop R100 per persoon. Registrasie vind op 8 September by Baleia Wines, asook die oggend voor die geleentheid plaas.
Drie bergfietswedrenne sal die dag plaasvind; die 88km-ren begin om 08:00 (R200 inskrywingsfooi), die 40km-ren om 08:15 (R140 inskrywingsfooi) en die 19km-ren om 08:30 (R80 inskrywingsfooi). Registrasie vind op 8 September by Baleia Wines, asook die oggend voor die wedren plaas. Wenners sal pryse ontvang en alle deelnemers wat die bergfietsren en vedlwedloop voltooi sal ‘n medalje ontvang. Gelukstrekkings sal ook plaasvind. Daar is baie parkering, eet- en drinkgoed, asook vermaak vir die kroos beskikbaar by La Bella Deli & Restaurant (geleë langs Baleia Wines kelder).
Die Baleia Wines-bergfietsuitdaging en -veldwedloop beloof ‘n perfekte lenteverwelkoming te wees en bied deelnemers, vriende en familie ‘n besonderse dag in die Hessequa-distrik.
Vir meer inligting oor die ren, inskrywings en roetes, besoek www. baleiawines.com; https://www.facebook. com/BaleiaWinesMTBChallenge/ Facebook blad: https://www.facebook. com/BaleiaWines/Twitter/Instagram: @ BaleiaWines.
Vir meer inligting kontak Adolf Botes by adolfbotes@mweb.co.za, telefoon 082 337 6286 of besoek ons webtuiste by http:// www.baleiawines.com/